തൊടുപുഴ ന്യൂമാൻ കോളേജിലെ അധ്യാപകനായിരുന്ന പ്രൊഫ ടിജെ ജോസഫിന്റെ കൈ വെട്ടിയ കേസിൽ അറസ്റ്റിലായ ഒന്നാം പ്രതി സവാദ് ഇപ്പോൾ തടവിൽ കഴിയുന്നത് എറണാകുളം സബ് ജയിലിലാണ്. ഈ മാസം 24 വരെ റിമാന്റിലായ സവാദിന്റെ തിരിച്ചറിയൽ പരേഡ് വേഗത്തിൽ പൂര്ത്തിയാക്കാൻ എൻഐഎ തീരുമാനിച്ചെന്നാണ് സൂചന. കൂടാതെ പ്രതിയുടെ കൈയ്യില് നിന്ന് പിടിച്ചെടുത്ത രണ്ട് മൊബൈല് ഫോണുകളില് വിശദമായ ഫൊറന്സിക്ക് പരിശോധന നടത്തും. കേസിന് പിന്നിലെ ഗൂഢാലോചന പുറത്തുകൊണ്ടുവരണമെന്നും പോപ്പുലർ ഫ്രണ്ട് നേതാക്കളുടെ സഹായത്തോടെയാണ് സവാദ് 13 വര്ഷം ഒളിവില് കഴിഞ്ഞതെന്നും എന്ഐഎ റിമാന്ഡ് റിപ്പോര്ട്ടില് ഉണ്ടായിരുന്നു.
