താങ്ങുവില ഉള്പ്പെടെയുള്ള ആവശ്യങ്ങള് മുന്നിർത്തി സംയുക്ത കിസാൻ മോർച്ച രാഷ്ട്രീയേതര വിഭാഗം ഉള്പ്പെടെയുള്ള ഇരുനൂറോളം കർഷക സംഘടനകളാണ് ചൊവ്വാഴ്ച സമരം പ്രഖ്യാപിച്ചിരിക്കുന്നത്. പതിമൂന്നിനാണ് സമരം പ്രഖ്യാപിച്ചിരിക്കുന്നതെങ്കിലും ഇന്നു തന്നെ പഞ്ചാബില് നിന്ന് കർഷകർ ട്രാക്ടർ മാർച്ച് തുടങ്ങാനാണ് സാധ്യത. ഇരുപതിനായിരത്തോളം കർഷകർ രണ്ടായിരം ട്രാക്ടറുകളുമായി ദില്ലിയിലേക്ക് വരുമെന്നാണ് ഇന്റലിജന്സ് റിപ്പോര്ട്ട്. പഞ്ചാബ്, ഹരിയാന, രാജസ്ഥാൻ, ഉത്തർപ്രദേശ്, കർണാടക സംസ്ഥാനങ്ങളിലെ കർഷകർ സമരത്തില് പങ്കെടുക്കുന്നുണ്ട്. അതോടൊപ്പം കർഷകരുടെ ദില്ലി മാർച്ചിനെ നേരിടാൻ ഹരിയാന ദില്ലി അതിര്ത്തികളില് കടുത്ത നിയന്ത്രണം ഏർപ്പെടുത്തി.
