ബോക്സ് ഓഫീസില്‍ നിന്നും അത്ര വലിയ പ്രതികരണങ്ങള്‍ ലഭിച്ചില്ലെങ്കിലും ആദ്യ ദിനത്തില്‍ ഗംഭീര കളക്ഷന്‍ നേടി രാഘവ ലോറന്‍സ്-കങ്കണ റണാവത്ത് ചിത്രം ‘ചന്ദ്രമുഖി 2’. ആദ്യ ദിനം 7.5 കോടി രൂപ കളക്ഷനാണ് ചിത്രം നേടിയിരിക്കുന്നത്. എന്നാല്‍ ആദ്യ ഭാഗവുമായി ചിത്രത്തെ താരതമ്യം ചെയ്യുമ്പോള്‍ ചന്ദ്രമുഖി 2 ഒന്നുമല്ല എന്ന അഭിപ്രായമാണ് സോഷ്യല്‍ മീഡിയയില്‍ ഉയര്‍ന്നു കൊണ്ടിരിക്കുന്നത്. ആദ്യ ഭാഗത്തില്‍ രജനികാന്ത് അവതരിപ്പിച്ച വേട്ടയ്യന്‍ രാജ എന്ന കഥാപാത്രമായാണ് രാഘവ ലോറന്‍സ് ചിത്രത്തില്‍ എത്തുന്നത്. ചന്ദ്രമുഖിയായി കങ്കണ എത്തുമ്പോള്‍ ഒരു പ്രധാന കഥാപാത്രമായി ലക്ഷ്മി മേനോനും ചിത്രത്തില്‍ വേഷമിടുന്നുണ്ട്. വടിവേലു, മഹിമ നമ്പ്യാര്‍, രാധിക ശരത്കുമാര്‍ എന്നിവരാണ് ചിത്രത്തില്‍ മറ്റ് കഥാപാത്രങ്ങളാകുന്നത്. ചന്ദ്രമുഖിയില്‍ അവതരിപ്പിച്ച അതേ കഥാപാത്രത്തെ തന്നെയാണ് ചന്ദ്രമുഖി 2വില്‍ വടിവേലു അവതരിപ്പിക്കുന്നത്. 18 വര്‍ഷത്തിന് ശേഷമാണ് ചന്ദ്രമുഖിക്ക് രണ്ടാം ഭാഗം എത്തിയത്. മലയാളത്തിലെ എവര്‍ഗ്രീന്‍ ഹിറ്റ് മണിച്ചിത്രത്താഴിന്റെ തമിഴ് റീമേക്ക് ആയിരുന്നു രജനികാന്ത് നായകനായി 2005ല്‍ പുറത്തെത്തിയ ചന്ദ്രമുഖി.