ഹോട്ടലുകള് ഉള്പ്പെടെ ഭക്ഷണ പാഴ്സലുകള് നല്കുന്ന ഭക്ഷ്യ സ്ഥാപനങ്ങള് ഭക്ഷണത്തിന്റെ കവറിന് പുറത്ത് ഉപയോഗിക്കേണ്ട സമയ പരിധിയുള്പ്പടെ പ്രദര്ശിപ്പിക്കുന്ന സ്റ്റിക്കറോ ലേബലോ നിര്ബന്ധമായും പതിക്കണമെന്ന് ഭക്ഷ്യ സുരക്ഷാ വകുപ്പിന്റെ നിര്ദ്ദേശമുണ്ട്. അതോടൊപ്പം നിയമം പാലിക്കുന്നുവെന്ന് ഉറപ്പു വരുത്തുന്നതിനായി ഭക്ഷ്യ സുരക്ഷാ വകുപ്പ് സ്പെഷ്യല് ടാസ്ക് ഫോഴ്സിന്റെ നേതൃത്വത്തില് സംസ്ഥാന വ്യാപകമായി പരിശോധന നടത്തിയതായി ആരോഗ്യ വകുപ്പ് മന്ത്രി വീണാ ജോര്ജ് അറിയിച്ചു. 52 സ്ക്വാഡുകളുടെ നേതൃത്വത്തില് 791 സ്ഥാപനങ്ങളിലാണ് പരിശോധനകള് നടത്തിയത്. ഗുരുതര നിയമ ലംഘനം കണ്ടെത്തിയ ആറ് സ്ഥാപനങ്ങളുടെ പ്രവര്ത്തനം നിര്ത്തിവയ്പ്പിച്ചു. നിയമ ലംഘനം കണ്ടെത്തിയ 114 സ്ഥാപനങ്ങള്ക്ക് പിഴ ഈടാക്കുന്നതിനുള്ള നോട്ടീസും 44 സ്ഥാപനങ്ങള്ക്ക് റെക്ടിഫിക്കേഷന് നോട്ടീസും നല്കി. 120 സ്ഥാപനങ്ങള്ക്ക് നേരെ അഡ്ജ്യൂഡിക്കേഷന് നടപടികളും സ്വീകരിക്കും.
