അനൂപ് മേനോന്റെ പുതിയ ചിത്രം ‘ചെക്‌മേറ്റ്’ ഫസ്റ്റ്‌ലുക്ക് പോസ്റ്റര്‍ പുറത്തിറങ്ങി. പൂര്‍ണമായും ന്യൂയോര്‍ക്കില്‍ ചിത്രീകരിച്ച ചിത്രത്തില്‍ അനൂപ് മേനോന്‍, ലാല്‍ എന്നിവര്‍ പ്രധാന വേഷങ്ങളിലഭിനയിക്കുന്നു. അമേരിക്കന്‍ മലയാളിയായ രതീഷ് ശേഖര്‍ കഥയും തിരക്കഥയും എഴുതി സംവിധാനം ചെയ്യുന്ന ചെക്‌മേറ്റ് ഒരു മൈന്‍ഡ്‌ഗെയിം ത്രില്ലറാണ്. ”നിങ്ങളുടെ ഓരോ നീക്കവും അവസാനത്തേത് ആയിരിക്കാം’ എന്ന ടാഗ് ലൈനോടെയാണ് പോസ്റ്റര്‍ എത്തിയിരിക്കുന്നത്. ഹരിശ്രീ അശോകനെപ്പോലുള്ള ഒട്ടേറെ കലാകാരന്മാരെ വളര്‍ത്തിക്കൊണ്ടുവന്ന ഹരിശ്രീ ട്രൂപ്പിന്റെ ഉടമയും സിദ്ദീഖ്‌ലാല്‍ ആദ്യമായി തിരക്കഥയെഴുതിയ ചിത്രം ‘പപ്പന്‍ പ്രിയപ്പെട്ട പപ്പന്റെ’ നിര്‍മാവാതാവുമായ ഹരിശ്രീ ഹരീന്ദ്രന്റെ മകള്‍ രേഖ ഹരീന്ദ്രന്‍ ആദ്യമായി മലയാള സിനിമയില്‍ നായികയാവുന്ന ചിത്രം കൂടിയാണ് ചെക്‌മേറ്റ്. അമേരിക്കയിലെ പ്രമുഖ ധനകാര്യസ്ഥാപനത്തില്‍ ഉദ്യോഗസ്ഥയായ രേഖ അറിയപ്പെടുന്ന മോഡലും ഡാന്‍സറും കൂടിയാണ്. സിനിമയ്ക്കായി ഒത്തുകൂടിയ ഒരു സംഘം മലയാളികളുടെ കൂട്ടായ്മയില്‍ പിറന്ന ചിത്രം വരുന്ന സെപ്റ്റംബറിന് തിയറ്ററുകളിലെത്തും.