സാംസങ് ഗാലറി ഇപ്പോള്‍ ഗൂഗിള്‍ ഫോട്ടോസിലേക്ക് ബന്ധിപ്പിക്കാം. ഇതുവഴി സാംസങ് ഉപകരണങ്ങളിലെ ഫോട്ടോകളും വീഡിയോകളും ഗൂഗിള്‍ ഫോട്ടോസിലേക്ക് ബാക്കപ്പ് ചെയ്യാനാവും. മൈക്രോസോഫ്റ്റിന്റെ വണ്‍ഡ്രൈവിനെ മാറ്റിയാണ് സാംസങ്ങിന്റെ ഗാലറി ആപ്പിനെ കമ്പനി ഗൂഗിള്‍ ഫോട്ടോസുമായി ബന്ധിപ്പിച്ചത്. സാംസങ് ഗാലറിയുടെ 15.9.01.07 പതിപ്പിലാണ് പുതിയ ഗൂഗിള്‍ ഫോട്ടോസ് സിങ്ക് ഓപ്ഷന്‍ എത്തിയിരിക്കുന്നത്. ഈ ഫീച്ചര്‍ ഉപയോഗിക്കാന്‍ Menu > Settings > Sync photos and videos തിരഞ്ഞെടുത്താല്‍ മതി. നിലവില്‍ ഈ ഫീച്ചര്‍ ഫോണുകളില്‍ ഘട്ടംഘട്ടമായി എത്തിച്ചുകൊണ്ടിരിക്കുന്നതിനാല്‍ എല്ലാവരുടെയും ഫോണുകളില്‍ ഈ ഫീച്ചര്‍ കണ്ടെന്നുവരില്ല. ഫോട്ടോ സിങ്ക് ഓണ്‍ ആക്കിയാല്‍ ഉപയോക്താക്കള്‍ക്ക് അവരുടെ ഗൂഗിള്‍ അക്കൗണ്ടുമായി ഗാലറിയെ ബന്ധിപ്പിക്കാം. ആന്‍ഡ്രോയിഡ് 13 അല്ലെങ്കില്‍ അതിനുശേഷമുള്ള പതിപ്പുകള്‍ പ്രവര്‍ത്തിക്കുന്ന സാംസങ് ഫോണുകളിലും വ്യക്തിഗത ഗൂഗിള്‍ അക്കൗണ്ടുകളിലും മാത്രമേ ഈ ഫീച്ചര്‍ ലഭ്യമാകൂ.
