മണ്ണുത്തി വടക്കഞ്ചേരി ദേശീയപാതയിലെ വഴുക്കുംപാറയില് വിള്ളലുണ്ടായ പ്രദേശത്ത് വീണ്ടും വിള്ളല് കൂടുതലായി രൂപപ്പെടുകയും ഇടിഞ്ഞു താഴുകയും ചെയ്തു. ഏകദേശം ഒന്നരയടി താഴ്ചയിലും 10 മീറ്റര് നീളത്തിലുമാണ് ഇടിഞ്ഞ് താഴ്ന്നത്.കഴിഞ്ഞ ആഴ്ചയില് കരാര് കമ്പനി ജീവനക്കാരുടെ നേതൃത്വത്തില് വെള്ളമിറങ്ങി റോഡ് ഇടിയാതിരിക്കുന്നതിനുവേണ്ടി സിമന്റ് പരുക്കന് ഉപയോഗിച്ച് വിള്ളല് അടയ്ക്കുകയും മുകളില് പോളിത്തീന് ഷീറ്റ് വിരിക്കുകയും ചെയ്തിരുന്നു. എന്നാല് രണ്ടുദിവസമായി പെയ്യുന്ന കനത്ത മഴയെ തുടര്ന്നാണ് പ്രദേശം കൂടുതല് അപകടാവസ്ഥയിലായത്.
