ശബരിമലയിൽ അരവണ നിർമാണം ആരംഭിച്ചു. നവീകരണത്തിനായി പ്ലാന്റ് അടച്ചിട്ടിരിക്കുകയായിരുന്നു. ദിവസം ഒന്നരലക്ഷത്തോളം ടിൻ അരവണ നിർമ്മിക്കുമെന്നാണ് റിപ്പോർട്ട്. ഒക്ടോബർ 20ന് ശേഷം മൂന്നര ലക്ഷത്തോളം ടിന്‍ പ്രതിദിനം ഉല്പാദിപ്പിക്കാനാകും. ഒരുമാസത്തോളം ആണ് പ്ലാൻറ് അടച്ചിട്ടിരുന്നത്. പ്ലാൻറ് നവീകരണം മൂലം അരവണക്ക് ക്ഷാമം ഉണ്ടായത് വിവാദമായിരുന്നു.

പദ്മശ്രീ ജേതാവും വയനാടൻ ഗോത്രകർഷകനുമായ ചെറുവയൽ രാമൻ (75) അന്തരിച്ചു. കോഴിക്കോട് മെഡിക്കൽ കോളേജ് ആശുപത്രിയിൽ ചികിത്സയിലിരിക്കെ ആയിരുന്നു അന്ത്യം. പാരമ്പര്യ നെൽവിത്തുകളുടെയും കൃഷിയുടെയും കാവലാളായിട്ടാണ് ചെറുവയൽ രാമൻ അറിയപ്പെട്ടിരുന്നത്. വയനാടിന്റെ നെല്ലച്ഛൻ എന്ന പേരിൽ പ്രശസ്തനായ അദ്ദേഹം, നൂറുവർഷങ്ങൾക്ക് മുൻപ് വയനാട്ടിലുണ്ടായിരുന്ന നൂറിലേറെ നാടൻ നെൽവിത്തിനങ്ങളിൽ മുപ്പതെണ്ണം കൃഷിചെയ്ത് നിലനിർത്തിയിരുന്നു. വയനാടിന്റെ മണ്ണിൽ തലമുറകളുടെ ഓർമ്മകൾക്ക് കാവൽ നിന്ന കർഷകനായിരുന്നു ചെറുവയൽ രാമനെന്ന് മുഖ്യമന്ത്രി അനുസ്മരിച്ചു.

മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാറിൻ്റെ രാജി ആവശ്യപ്പെട്ട് നടന്ന ജന്തർ മന്തറിലെ പ്രതിഷേധത്തിനിടെ പരിക്കേറ്റ വിദ്യാർത്ഥികൾക്കൊപ്പം മാധ്യമങ്ങളെ കണ്ട് രാഹുൽ ​ഗാന്ധി. വെടിയുണ്ടകളെ പേടിയില്ലെന്ന് വിദ്യാർത്ഥികൾ പ്രതികരിച്ചു. ദില്ലി പൊലീസ് ക്രൂരമായി മർദിച്ചുവെന്നും വിദ്യാർത്ഥികൾ പറഞ്ഞു. ഋതു എന്ന പെൺകുട്ടിയാണ് രാഹുലിനൊപ്പം ഉണ്ടായിരുന്നത്. ആതിര എന്ന പെൺകുട്ടിയുടെ ഒരു ചെവിയുടെ കേൾവിശക്തി നഷ്ടപ്പെട്ടെന്ന് രാഹുൽ ​ഗാന്ധി പറഞ്ഞു. സ്ത്രീ എന്ന പരി​ഗണന പോലും പൊലീസ് നൽകിയില്ലെന്ന് ആതിര മാധ്യമങ്ങളോട് സംസാരിക്കവേ വെളിപ്പെടുത്തി.