യുദ്ധം അവസാനിപ്പിക്കാനുള്ള പരിഹാരം അമേരിക്കയെ അറിയിച്ചെന്ന് ഇറാൻ. ഇറാൻ വിദേശകാര്യ മന്ത്രിയാണ് ഇക്കാര്യം വ്യക്തമാക്കിയത്. സമാധാന ചർച്ചകളിൽ ഇറാൻ മുന്നോട്ടുവെച്ച ഉപാധികളിൽ അമേരിക്ക നാളെ നിലപാടറിയിച്ചേക്കും. അമേരിക്ക പരിഹാരം ആഗ്രഹിക്കുന്നുണ്ടെങ്കിൽ മുന്നോട്ട് പോകാമെന്നും എല്ലാ കാര്യങ്ങളും ഖത്തറിനെ അറിയിച്ചെന്നും അബ്ബാസ് അരാഗ്ച്ചി പറഞ്ഞു. ഹോർമൂസ് തുറക്കുന്നതിൽ ഉൾപ്പടെയാണ് ഇറാൻ തങ്ങളുടെ നിലപാടറിയിച്ചിരിക്കുന്നത്.

തദ്ദേശ ഉപതെരഞ്ഞെടുപ്പ് ഫലം ചെങ്കൊടിക്കുതിപ്പ് എന്ന് പ്രതിപക്ഷ നേതാവ് പിണറായി വിജയൻ. സർക്കാരിനോട് ജനങ്ങൾക്കുള്ള കടുത്ത അമർഷം തെരഞ്ഞെടുപ്പിൽ പ്രതിഫലിച്ചുവെന്നും യുഡിഎഫ് സർക്കാരിന്റെ നയ വൈകല്യങ്ങളോടുള്ള ജനങ്ങളുടെ പ്രതിഷേധമാണ് തെരഞ്ഞെടുപ്പ് ഫലമെന്നും പിണറായി വിജയൻ സാമൂഹിക മാധ്യമങ്ങളിൽ കുറിച്ചു. വിസ്മയമല്ല വികസനത്തിന്റെ വിനാശമാണ് യുഡിഎഫ് സർക്കാർ എന്ന് ജനങ്ങൾ തിരിച്ചറിഞ്ഞെന്നും ഫേസ്ബുക്കിൽ കുറിച്ചു.

ജനറൽ ആശുപത്രി വളപ്പിൽ നിന്നും 12 ലോറി മാലിന്യവും നാല് ലോറി പാഴ്മരക്കഷണങ്ങളും നീക്കം ചെയ്തതിന് പിന്നാലെ കണ്ണാശുപത്രി പരിസരത്തും മെഗാ ക്ലീനിംഗിന് തിരുവനന്തപുരം നഗരസഭ. തലസ്ഥാനത്തെ ഏറ്റവും പ്രധാനപ്പെട്ട നേത്ര ചികിത്സാ കേന്ദ്രമായ ഗവണ്‍മെന്‍റ് കണ്ണാശുപത്രി വളപ്പിലെ 6 ഏക്കർ കോമ്പൗണ്ട് കാലങ്ങളായി കാടും പടർപ്പും മാലിന്യക്കൂനകളും നിറഞ്ഞ അവസ്ഥയിലാണ്. ആശുപത്രി ക്കുള്ളിലെത്തുന്നവരെ മാത്രമല്ല, സമീപവാസികളെയും ഇത് ദോഷകരമായി ബാധിക്കുന്നതിനാലാണ് നഗരസഭയുടെ ഇടപെടൽ.