തദ്ദേശ സ്വയംഭരണ വാര്ഡുകളിലേക്ക് നടന്ന ഉപതിരഞ്ഞെടുപ്പിന്റെ ഫലം എല് ഡി എഫ് ഭരണത്തെ ജനം വെറുത്തതിന്റെ തെളിവാണെന്ന് കെ പി സി സി അധ്യക്ഷൻ കെ സുധാകരന് എം പി. മുഖ്യമന്ത്രി പിണറായി വിജയനും എല് ഡി എഫ് ദുര്ഭരണത്തിനുമെതിരായ ശക്തമായ രോഷം സമൂഹത്തിന്റെ അടിത്തട്ടില് പ്രതിഫലിച്ചതിന്റെ തെളിവാണ് തദ്ദേശ ഉപതിരഞ്ഞെടുപ്പ് ഫലമെന്നും സുധാകരന് കൂട്ടിച്ചേർത്തു. സംസ്ഥാനത്തെ 31 തദ്ദേശ സ്വയംഭരണ വാര്ഡുകളിലേക്ക് നടന്ന ഉപതിരഞ്ഞെടുപ്പില് എല്ഡിഎഫില് നിന്ന് 9 വാര്ഡുകള് യുഡിഎഫ് പിടിച്ചെടുത്ത് പതിനേഴ് വാര്ഡുകളില് തിളക്കമാര്ന്ന വിജയം നേടി യുഡിഎഫ് ജനപിന്തുണ വര്ധിപ്പിച്ചെന്നും സുധാകരൻ വ്യക്തമാക്കി.
