ഹനുമാന് എന്ന ബ്ലോക്ക്ബസ്റ്റര് ചിത്രത്തിലൂടെ പ്രശാന്ത് വര്മ്മ സിനിമാറ്റിക് യൂണിവേഴ്സ് സൃഷ്ടിച്ച സംവിധായകന് പ്രശാന്ത് വര്മയുടെ രചനയില് ഒരുങ്ങുന്ന പുതിയ ചിത്രമായ ‘മഹാകാളി’യിലെ നായികയായി ഭൂമി ഷെട്ടി. ചിത്രത്തിലെ നായികയെ അവതരിപ്പിച്ചു കൊണ്ടുള്ള പോസ്റ്റര് പുറത്ത്. ഇന്ത്യന് സിനിമയിലേക്ക് ഒരു വനിതാ സൂപ്പര് ഹീറോയെ അവതരിപ്പിക്കുന്ന ചിത്രം പ്രശാന്ത് വര്മ്മ സിനിമാറ്റിക് യൂണിവേഴ്സിലെ മൂന്നാം ചിത്രമായി ആണ് ഒരുങ്ങുന്നത്. ചിത്രം സംവിധാനം ചെയ്യുന്നത് പൂജ അപര്ണ്ണ കൊല്ലുരുവാണ്. ആര്കെഡി സ്റ്റുഡിയോയുടെ ബാനറില് റിവാസ് രമേശ് ദുഗ്ഗല് നിര്മ്മിക്കുന്ന ചിത്രം അവതരിപ്പിക്കുന്നത് ആര്കെ ദുഗ്ഗല്. ആത്മീയതയും പുരാണവും സമകാലിക പ്രശ്നങ്ങളുമായി സംയോജിപ്പിച്ച് കൊണ്ടാണ് ‘മഹാകാളി’ ഒരുക്കുന്നത്. ഇന്ത്യന് സിനിമയിലെ സ്റ്റീരിയോടൈപ്പുകള് തകര്ത്ത് കൊണ്ട്, ഈ ശക്തമായ സാമൂഹിക പ്രസക്തിയുള്ള ചിത്രത്തിലൂടെ കറുത്ത നിറമുള്ള ഒരു നായികയെ സൂപ്പര്ഹീറോ മഹാകാളി ആയി അവതരിപ്പിക്കുകയാണ്. കാളി ദേവിയുമായി ആഴത്തില് ബന്ധപ്പെട്ടിരിക്കുന്ന ബംഗാളിന്റെ പശ്ചാത്തലത്തിലാണ് ഈ ചിത്രം ഒരുക്കുന്നത്. ഇന്ത്യന്, വിദേശ ഭാഷകളില് ഐമാക്സ് ത്രീഡി ഫോര്മാറ്റിലാകും ചിത്രം പുറത്തു വരിക.
