കേന്ദ്ര സഹമന്ത്രിയും തൃശൂര് എം.പിയുമായ സുരേഷ് ഗോപി കലുങ്ക് സംവാദങ്ങള് എന്ന പേരില് ഫ്യൂഡല് കാലഘട്ടത്തിലെ ദര്ബാറുകളെ അനുസ്മരിപ്പിക്കുന്ന യോഗങ്ങള് സംഘടിപ്പിച്ച് പാവപ്പെട്ടവരെ പരിഹസിക്കുകയും പരദൂഷണം നടത്തുകയും ചെയ്യുന്ന പരിപാടി അപലപനീയമാണെന്ന് മന്ത്രി ആർ. ബിന്ദു. ഇരിങ്ങാലക്കുടയില് സംഘടിപ്പിച്ച കലുങ്ക് പരിപാടിയില് തന്റെ പ്രശ്നം അവതരിപ്പിച്ച വായോധികയോട് അദ്ദേഹം നടത്തിയ പ്രതികരണങ്ങള് ജനാധിപത്യ മര്യാദകള്ക്ക് നിരക്കുന്നതല്ല. ജീവിതത്തിലാണോ സിനിമയിലാണോ താനെന്ന വിഭ്രമത്തിലാണ് അദ്ദേഹം എന്ന് തോന്നും വിധമാണ് സുരേഷ് ഗോപിയുടെ പ്രതികരണങ്ങള്. തിരക്കഥാകൃത്തുക്കള് സമ്മാനിച്ച ഫ്യൂഡല് മാടമ്പി വേഷക്കാരനായി സിനിമയിലല്ലാത്തപ്പോഴും തെരുവിലിറങ്ങി നടക്കുന്നത് ജനങ്ങളുടെ ക്ഷമ പരീക്ഷിച്ചുകൊണ്ടാവരുത്. സിനിമകളില് ആരാധകരെ ത്രസിപ്പിച്ച താരം ഡയലോഗുകളുമായി തന്നെ സമീപിക്കുന്ന സാധാരണക്കാരുടെ നെഞ്ചത്ത് കേറുന്ന രീതി തുടര്ച്ചയായി അദ്ദേഹത്തില്നിന്നും ഉണ്ടാവുന്നതു കൊണ്ടാണ് ഇതു പറയാന് നിര്ബന്ധിതയാകുന്നതെന്നും മന്ത്രി വ്യക്തമാക്കി.
