അർജുന് വേണ്ടിയുള്ള തെരച്ചിൽ ദൗത്യം പതിനൊന്നാം ദിവസമായ ഇന്നും തുടരും. സ്ഥിതിഗതികള് വിലയിരുത്താന് മുഖ്യമന്ത്രിയുടെ നിർദേശ പ്രകാരം മന്ത്രിമാരായ പി എ മുഹമ്മദ് റിയാസും എ കെ ശശീന്ദ്രനും ഇന്ന് ഉച്ചയോടെ ഷിരൂരിലെത്തും. അതോടൊപ്പം അർജുനായുള്ള തെരച്ചിൽ ദൗത്യത്തില് കാലാവസ്ഥ വെല്ലുവിളിയെന്ന് മനസിലാക്കുന്നുവെന്ന് അര്ജുന്റെ സഹോദരിയുടെ ഭര്ത്താവ് ജിതിന് വ്യക്തമാക്കി. സ്ഥലത്ത് കനത്ത മഴയാണെങ്കിലും അടിയൊഴുക്ക് കുറഞ്ഞ് നദിയിൽ തെരച്ചില് നടത്താന് സാധിക്കണമെന്നാണ് ആഗ്രഹിക്കുന്നത്. അര്ജുനായുള്ള ദൗത്യത്തില് മറ്റൊരു ജീവന് കൂടി അപകടത്തിലാകരുതെന്നും കുടുംബാംഗങ്ങളെ സാഹചര്യം ബോധ്യപ്പെടുത്തിയിട്ടുണ്ടെന്നും ജിതിന് കൂട്ടിച്ചേർത്തു.
