പാലക്കാട് പനയമ്പാടത്ത് നാല് കുട്ടികളുടെ ജീവനെടുത്ത അപകടത്തില് പരിക്കേറ്റ് ആശുപത്രിയില് കഴിയുന്ന ലോറി ഡ്രൈവർ മഹേന്ദ്ര പ്രസാദിന്റെയും ക്ലീനർ വർഗീസിൻ്റെയും മൊഴി കല്ലടിക്കോട് പൊലീസിൻ്റെ നേതൃത്വത്തിൽ ഇന്ന് രേഖപ്പെടുത്തും. ഇതിന് ശേഷമായിരിക്കും ഇവര്ക്കെതിരെ കേസെടുക്കുന്ന കാര്യത്തിലേക്ക് കടക്കുക. എതിരെ വന്ന വാഹന ഉടമയെയും വിശദമായി ചോദ്യം ചെയ്യും. ഈ വാഹനത്തിന്റെ ഡ്രൈവര് വണ്ടൂർ സ്വദേശി പ്രജീഷിനെതിരെ ഇന്നലെ പൊലീസ് കേസെടുത്തിരുന്നു. അതോടൊപ്പം അപകടത്തില്പ്പെട്ട വാഹനത്തിലുള്ള ലോഡിന്റെ ഭാരം കൃത്യമായിരുന്നുവെന്ന് ആര്ടിഒ വ്യക്തമാക്കി. ഹൈഡ്രോ പ്ലെയിനിങിന് സാധ്യത കൂടുതലുള്ള സ്ഥലമാണെന്നും ലോഡ് ചെക്ക് ചെയ്തപ്പോള് അതെല്ലാം ശരിയാണെന്നും ഓവര് ലോഡ് ഇല്ല ടയറുകള്ക്കും പ്രശ്നമില്ല അധികം പഴക്കമില്ലാത്ത വണ്ടിയാണെന്നും അദ്ദേഹം പറഞ്ഞു. മുമ്പ് ഇവിടെ അപകടം നടന്നതിനാൽ ഐഐടി പഠന റിപ്പോര്ട്ട് വാങ്ങിയിരുന്നു ഇക്കാര്യം ചര്ച്ച ചെയ്ത് പനയമ്പാടത്തെ അപകടമേഖലയിലെ പ്രശ്നം പരിഹരിക്കാനുള്ള നടപടി സ്വീകരിച്ചുവരുകയായിരുന്നു ഇതിനിടെയാണ് ഈ സംഭവം ഉണ്ടായതെന്നും ആര്ടിഒ കൂട്ടിച്ചേർത്തു .
