ശബരിമല മണ്ഡല മകരവിളക്ക് മഹോത്സവത്തോടനുബന്ധിച്ച് ജില്ലാ കലക്ടര് എസ് പ്രേം കൃഷ്ണന്റെ അധ്യക്ഷതയില് കലക്ടേറ്റ് കോണ്ഫറന്സ് ഹാളില് യോഗം ചേർന്നു. മരക്കൂട്ടം മുതല് ശരംകുത്തി നെക്ക് പോയിന്റ് വരെ താല്ക്കാലിക പന്തല് നിര്മിക്കാന് തീരുമാനമായി. തീര്ത്ഥാടകര്ക്ക് കൂടുതല് സൗകര്യം ഏര്പ്പെടുത്തുന്നതിന്റെ ഭാഗമായാണ് ദേവസ്വം ബോര്ഡിന്റെ പന്തല് നിര്മാണം. റാന്നിയില് 24 മണിക്കൂറും പ്രവര്ത്തിക്കുന്ന എക്സൈസ് കണ്ട്രോള് റൂം ആരംഭിക്കും. തീര്ത്ഥാടന കാലയളവിലെ ഭക്ഷണ സാധനങ്ങളുടെ വിലവിവര പട്ടിക കടകളില് പ്രദര്ശിപ്പിക്കും. ഭക്ഷണ സാധനങ്ങളുടെ ഗുണമേന്മയും വൃത്തിയും ഉറപ്പാക്കും. ദേവസ്വം ബോര്ഡുമായുള്ള ആശയവിനിമയത്തിന് പ്രധാനവകുപ്പുകള് ലെയ്സണ് ഓഫീസര്മാരെ നിയമിക്കാന് ജില്ലാ കലക്ടര് നിര്ദേശിച്ചു. ജില്ലാ പൊലീസ് മേധാവി ആര് ആനന്ദ്, ഡെപ്യൂട്ടി കലക്ടര് ആര് രാജലക്ഷ്മി, വകുപ്പ് ഉദ്യോഗസ്ഥര് തുടങ്ങിയവര് പങ്കെടുത്തു.
