പത്ത് ദിവസത്തിനുള്ളിൽ നോട്ടീസിന് മറുപടി നൽകുമെന്ന് രാഹുല് ഗാന്ധി വ്യക്തമാക്കി. സമാനമായ ഒരു യാത്ര ഏതെങ്കിലും ഭരണകക്ഷി നേതാക്കൾ നടത്തി ഇങ്ങനെ പറഞ്ഞിരുന്നെങ്കിൽ പിന്നാലെ പോകുമായിരുന്നോയെന്നും രാഹുൽ പൊലീസിനോട് ചോദിച്ചു. പീഡനത്തിനിരയായ പെണ്കുട്ടികള് തങ്ങളുടെ ദുരവസ്ഥ നേരിട്ട് വന്ന് കണ്ട് അറിയിച്ചുവെന്ന കശ്മീരിലെ പ്രസംഗത്തില് വിശദീകരണം ആവശ്യപ്പെട്ടാണ് പൊലീസ് നോട്ടീസ് നല്കിയത്. കഴിഞ്ഞ ജനുവരി മുപ്പതിന് ഭാരത് ജോഡോ യാത്രയുടെ സമാപന സമ്മേളനത്തിലെ പ്രസംഗത്തില് രാഹുല് ഗാന്ധി നടത്തിയ പരാമര്ശത്തിന് പിന്നാലെ കൂടിയിരിക്കുകയാണ് ഡൽഹി പൊലീസ്. ഇന്ന് രാവിലെ പത്തരയോടെ തുഗ്ലക്ക് റോഡിലെ രാഹുലിന്റെ വസതി പൊലീസ് വളഞ്ഞു. പ്രസംഗത്തില് പറഞ്ഞ സ്ത്രീകളുടെ വിശദാംശങ്ങള്, സംഭവം നടന്നത് എപ്പോള്? അവരെ പീഡിപ്പിച്ചവര്ക്കെതിരെ കേസ് എടുത്തോ? തുടങ്ങിയ കാര്യങ്ങളാരാഞ്ഞ് രാഹുലിന് ഒരു ചോദ്യാവലി പൊലീസ് നേരത്തെ നല്കിയിരുന്നു. കഴിഞ്ഞ ബുധന്, വ്യാഴം ദിവസങ്ങളില് വീട്ടിലെത്തി മൊഴിയെടുക്കാനും ശ്രമിച്ചിരുന്നു.
