കുന്നംകുളം കസ്റ്റഡി മര്ദനത്തില് നടപടിവേണമെന്ന് ആവശ്യപ്പെട്ട് നിയമസഭാകവാടത്തിൽ സമരം ഇരിക്കുമെന്ന് പ്രഖ്യാപിച്ച് പ്രതിപക്ഷ നേതാവ് വിഡി സതീശൻ. കവാടത്തില് സത്യാഗ്രഹ സമരമിരിക്കുന്നത് എംഎല്എ സനീഷ് കുമാറും എംഎല്എ എകെഎം അഷറഫുമാണ്. പൊലീസുകാര്ക്കെതിരെ നടപടി എടുക്കും വരെ സമരമിരിക്കും എന്നാണ് പ്രതിപക്ഷത്തിൻ്റെ നിലപാട്. കഴിഞ്ഞ ദിവസങ്ങളിലായി തൃശ്ശൂരിലെ കുന്നംകുളത്തെയും പീച്ചിയിലെയും കസ്റ്റഡി മര്ദനങ്ങൾ വലിയ രീതിയില് ചര്ച്ചയായിരുന്നു. മാത്രമല്ല ഇതിനെ തുടര്ന്ന് സമാനമായ സംഭവങ്ങൾ റിപ്പോര്ട്ട് ചെയ്യപ്പെടുകയും ചെയ്തു. വിഷയത്തില് രണ്ടരമണിക്കൂറിലധികമാണ് നിയമസഭയില് അടിയന്തിര പ്രമേയത്തില് ചര്ച്ച നടന്നത്. കസ്റ്റഡി മര്ദനത്തില് പ്രതികളായ പൊലീസുദ്യോഗസ്ഥരെ പിരിച്ചുവിടണമെന്നാണ് പ്രതിപക്ഷം സഭയില് ആവശ്യപ്പെട്ടത്. തുടര്ന്ന് പ്രതിപക്ഷം സഭ ബഹിഷ്കരിച്ച് ഇറങ്ങിപ്പോയി.
