കേന്ദ്രധനമന്ത്രി നിര്മ്മല സീതാരാമനുമായി മുഖ്യമന്ത്രി പിണറായി വിജയനുമായി നടത്തിയ കൂടിക്കാഴ്ച ദുരൂഹമെന്ന ആരോപണം കടുപ്പിച്ച് പ്രതിപക്ഷം. മകള്ക്കെതിരെ ധനമന്ത്രിയുടെ കീഴിലുള്ള ഏജന്സി അന്വേഷണം നടത്തുമ്പോള് നിര്മ്മല സീതാരാമനെ ക്ഷണിച്ച് മുഖ്യമന്ത്രി ചര്ച്ച നടത്തിയത് സംശകരമാണെന്ന് എന്കെ പ്രേമചന്ദ്രന് എംപി കുറ്റപ്പെടുത്തി. ഭിന്നരാഷ്ട്രീയമുള്ള രണ്ട് പേര് കണ്ടാല് രാഷ്ട്രീയം ഉരുകിപോകില്ലെന്ന മുഖ്യമന്ത്രിയുടെ ന്യായീകരണത്തെ, പ്രധാനമന്ത്രിയുമായി താന് ഉച്ചഭക്ഷണം കഴിച്ചപ്പോള് സിപിഎം നടത്തിയ തേജോവധം ഓര്മ്മപ്പെടുത്തി പ്രേമചന്ദ്രന് പരിഹസിക്കുകയും ചെയ്തു. അതോടൊപ്പം കൂടിക്കാഴ്ചയുടെ വിവരങ്ങള് മുഖ്യമന്ത്രി പുറത്ത് പറയാത്തിടത്തോളം ദുരൂഹത തുടരുമെന്ന് രമേശ് ചെന്നിത്തലയും വിമര്ശിച്ചു.
