അമേരിക്കന് സിനിമാ നിര്മാണ കമ്പനി വാര്ണര് ബ്രദേഴ്സിനെ ഏറ്റെടുക്കാന് നെറ്റ്ഫ്ലിക്സ്. കരാര് പ്രകാരം വാര്ണര് ബ്രദേഴ്സ് ഓഹരി ഉടമകള്ക്ക് ഓരോ ഓഹരിക്കും 27.75 ഡോളര് പണമായി നല്കും. നെറ്റ്ഫ്ളിക്സില് ഓഹരിയും ലഭിക്കും. കരാറിന്റെ മൊത്തം ഓഹരി മൂല്യം 72 ബില്യണ് (7200 കോടി) ഡോളറാണ്. കരാര് പ്രകാരം വാര്ണര് ബ്രദേഴ്സിന്റെ സിനിമ, ടെലിവിഷന് സ്റ്റുഡിയോകളും എച്ച്ബിഒ, എച്ച്ബിഒ മാക്സ് എന്നീ ചാനലുകളുമടക്കം നെറ്റ്ഫ്ലിക്സിന്റെ ഭാഗമാവും. അടുത്ത വര്ഷം മധ്യത്തോടെ പൂര്ത്തിയാവുന്ന ഏറ്റെടുക്കലോടെ വാര്ണര് ബ്രദേഴ്സിന്റെ പക്കലുള്ള ലോകപ്രശസ്ത സിനിമാ, സിരീസ് ടൈറ്റിലുകളൊക്കെയും നെറ്റ്ഫ്ലിക്സിലൂടെ ലഭ്യമാവും. നിരവധി ഹിറ്റ് ഷോകളുടെ ലൈബ്രറിയും, വാര്ണര് ബ്രദേഴ്സിന്റെ കാലിഫോര്ണിയയിലെ ബര്ബാങ്കിലുള്ള വിശാലമായ സ്റ്റുഡിയോകളും, ‘ഹാരി പോട്ടര്’, ‘ഫ്രണ്ട്സ്’ എന്നിവ ഉള്ക്കൊള്ളുന്ന വിപുലമായ ചലച്ചിത്ര, ടിവി ആര്ക്കൈവും നെറ്റ്ഫ്ലിക്സിന് സ്വന്തമാകും.
