മുത്തൂറ്റ് ഫിനാന്സ് നടപ്പ് സാമ്പത്തിക വര്ഷത്തിലെ രണ്ടാം പാദത്തില് 2,412 കോടി രൂപയുടെ സംയോജിത ലാഭം രേഖപ്പെടുത്തി. തൊട്ടു മുന്വര്ഷത്തെ സമാനപാദത്തിലെ 1,321 കോടി രൂപയില് നിന്ന് ലാഭം 83 ശതമാനം വര്ധിച്ചു. ഇക്കാലയളവില് വരുമാനം മുന്വര്ഷത്തെ 4,957 കോടി രൂപയില് നിന്ന് 47 ശതമാനം വര്ധനയോടെ 7,332 കോടി രൂപയായി. ആദ്യ അര്ദ്ധവര്ഷത്തില് 4,391 കോടി രൂപയുടെ ലാഭമാണ് മുത്തൂറ്റ് ഫിനാന്സ് മാത്രം കൈവരിച്ചത്. മുത്തൂറ്റ് ഗ്രൂപ്പ് കൈകാര്യം ചെയ്യുന്ന സംയോജിത വായ്പ ആസ്തികള് 42 ശതമാനം വാര്ഷിക വര്ധനയോടെ എക്കാലത്തെയും ഏറ്റവും ഉയര്ന്ന നിലയിലായ 1,47,673 കോടി രൂപയിലെത്തി. മുത്തൂറ്റ് ഫിനാന്സിന്റെ മാത്രം വായ്പകള് 1,32,305 കോടി രൂപയിലെത്തിയിട്ടുണ്ട്. എക്കാലത്തെയും ഏറ്റവും ഉയര്ന്ന നിലയിലുള്ള 47 ശതമാനം വര്ധനവാണ് ഇക്കാര്യത്തില് ഉണ്ടായിട്ടുള്ളത്. സ്വര്ണ പണയ വായ്പകളുടെ കാര്യത്തില് ചരിത്രത്തിലെ ഏറ്റവും വലിയ നേട്ടമാണ് കമ്പനി കൈവരിച്ചിട്ടുള്ളത്, 45 ശതമാനം. ഇതോടെ സ്വര്ണ പണയ വായ്പകള് 1,24,918 കോടി രൂപയെന്ന നേട്ടവും കൈവരിച്ചു.
