ഏറ്റവും വലിയ അഗ്‌നിപര്‍വതത്തില്‍ മലയാളി
ലോകത്തിലെ ഏറ്റവും ഉയരം കൂടിയ സജീവമായ അഗ്നിപര്‍വ്വതം ഒരു മലയാളി യുവാവ് കീഴടക്കി. പത്തനംതിട്ട പന്തളം പൂഴിക്കാട് ദാറുല്‍ കറാമില്‍ എം എ അലി അഹമ്മദ് ഖാന്റെയും ജെ ഷാഹിദയുടെയും മകനായ ഷെയ്ഖ് ഹസന്‍ ഖാന്‍ എന്ന മുപ്പത്താറുകാരനാണ് ഈ പര്‍വതാരോഹകന്‍. അര്‍ജന്റീന – ചിലി അതിര്‍ത്തിയിലെ ഓഗോസ് ദെല്‍ സലോദോയാണ് ഇദ്ദേഹം കീഴടക്കിയത്. 22,600 അടി ഉയരമുള്ള അഗ്നിപര്‍വ്വതത്തിനു നിറുകയില്‍ ഇന്ത്യയുടെ ദേശീയ പതാക ഉയര്‍ത്തിപ്പിടിച്ചു നില്‍ക്കുന്ന ഷെയ്ഖ് ഹസന്‍ ഖാന്റെ ചിത്രം സാമൂഹിക മാധ്യമങ്ങളില്‍ പങ്കുവയ്ക്കപ്പെട്ടു. ഷെയ്ഖ് ഹസന്‍ ഖാന്‍ തിരുവനന്തപുരത്ത് സെക്രട്ടേറിയേറ്റില്‍ ധനകാര്യവകുപ്പ് അസിസ്റ്റന്റ് സെക്ഷന്‍ ഓഫീസറാണ്. 2022 ല്‍ ഷെയ്ഖ് ഹസന്‍ ഖാന്‍ ഏവറസ്റ്റ് കീഴടക്കിയിരുന്നു. ലോകത്തിലെ ഉയരം കൂടിയ മറ്റ് പര്‍വ്വതങ്ങളായ കിളിമഞ്ചാരോ, വടക്കന്‍ അമേരിക്കയിലെ ഡെനാലി, അന്റാര്‍ട്ടിക്കയിലെ മൗണ്ട് വിന്‍സന്‍ എന്നീ പര്‍വ്വതങ്ങള്‍ കീഴടക്കിയ ശേഷമാണ് ലോകത്തിലെ ഏറ്റവും ഉയരമുള്ള അഗ്നിപര്‍വ്വതമായ ഓഗോസ് ദെല്‍ സലോദോ പര്‍വതം ഷെയ്ഖ് ഹസന്‍ ഖാന്‍ കീഴടക്കിയത്.
