ഖലിസ്ഥാൻ വാദി നേതാവ് അമൃത്പാൽ സിങ് മാർച്ച് 21ന് ഡൽഹിയില് എത്തിയതായി സൂചന. ഡൽഹിയിലേതെന്ന് സംശയിക്കുന്ന അമൃത്പാലിന്റെയും സഹായിയുടെയും സിസിടിവി ദൃശ്യങ്ങള് പുറത്തുവന്നു. അമൃത്പാലിനെതിരായ നടപടിയും സിഖ് പ്രക്ഷോഭവും തുടരുന്നതിനിടെ ബിബിസി പഞ്ചാബിയുടെ ട്വിറ്റർ അക്കൗണ്ടിന് ഇന്ത്യയില് വിലക്കേർപ്പെടുത്തി.അമൃത്പാല് സിങിനായുള്ള തെരച്ചില് നേപ്പാള് വരെ എത്തി നിൽക്കുമ്പോഴാണ് ഡൽഹിയിലേതെന്ന് സംശയിക്കുന്ന ദൃശ്യങ്ങള് പുറത്ത് വരുന്നത്. സിക്ക് തലപ്പാവില്ലാതെ കൂളിങ്ഗ്ലാസും ജാക്കറ്റും ധരിച്ച് നടന്നു നീങ്ങുന്ന അമൃത്പാല് സിങാണ് ദൃശ്യങ്ങളിലുള്ളത്. സഹായിയായ പൽപ്രീത് സിങും അമൃത്പാലിനൊപ്പമുണ്ട്. ഈ ചിത്രം മാർച്ച് 21 ന് ഡൽഹിയിലേതെന്നാണ് പൊലീസ് കരുതുന്നത്. നേരത്തെ ഹരിയാനയിലെ കുരുക്ഷേത്രയില് അമൃത്പാല് താമസിച്ചതായുള്ള തെളിവുകള് പഞ്ചാബ് പൊലീസിന് ലഭിച്ചിരുന്നു. അതിനാല് കുരക്ഷേത്രയില് നിന്ന് അമൃത്പാല് നേരെ ഡൽഹിയിലെത്തി എന്നാണ് അനുമാനം.
