ആലപ്പുഴ വണ്ടാനം മെഡിക്കല് കോളജില് നിയമനത്തിന് കൈക്കൂലിയെന്ന ജി സുധാകരന് എംഎല്എയുടെ ആരോപണത്തില് വിജിലന്സ് അന്വേഷണം വേണമെന്ന് ആവശ്യപ്പെട്ട് സിപിഐഎം നേതാവ് എച്ച് സലാം ആഭ്യന്തരമന്ത്രി രമേശ് ചെന്നിത്തലയ്ക്ക് പരാതി നല്കി. അന്വേഷണമുണ്ടാകുമെന്ന് മന്ത്രി ഉറപ്പുനല്കി. കഴിഞ്ഞ ജൂണ് 26ന് ആശുപത്രിയില് നടന്ന ഒരു പൊതുപരിപാടിയിലായിരുന്നു സുധാകരന് ആരോപണം ഉന്നയിച്ചത്. ആലപ്പുഴ മെഡിക്കല് കോളജില് എല്ഡിഎഫ് സര്ക്കാരിന്റെ അഞ്ച് വര്ഷക്കാലം നൂറ് പേരെ നിയമിച്ചുവെന്നും ഒരാള്ക്ക് രണ്ട് ലക്ഷം രൂപ കൈക്കൂലി വാങ്ങിയാണ് നിയമനം നടന്നതെന്നും കൈക്കൂലി വാങ്ങിയവരെ തനിക്ക് അറിയാമെന്നുമാണ് ജി സുധാകരന് പരസ്യമായി പ്രതികരിച്ചത്.
