സിദ്ധാര്ഥ് മല്ഹോത്രയും തമന്ന ഭാട്ടിയയും കേന്ദ്രകഥാപാത്രങ്ങളെ അവതരിപ്പിക്കുന്ന ‘ദി വാന്- ഫോഴ്സ് ഓഫ് ദി ഫോറസ്റ്റ്’ എന്ന ചിത്രത്തിന്റെ അണിയറ പ്രവര്ത്തകര്ക്കെതിരെ ഗുരുതര ആരോപണവുമായി ഗായകനും സംഗീതസംവിധായകനുമായ സര്ഗം വൈശ്. തന്റെ അനുമതിയില്ലാതെയാണ് ‘അയി ഗിരിനന്ദിനി’ എന്ന ഗാനം സിനിമയുടെ ട്രെയ്ലറില് ഉപയോഗിച്ചതെന്ന് സര്ഗം വൈശ് ഇന്സ്റ്റാഗ്രാമിലൂടെ ആരോപിച്ചു. പാട്ട് ട്രെയ്ലറില്നിന്ന് പിന്വലിക്കണമെന്നും അല്ലാത്തപക്ഷം നിയമനടപടി സ്വീകരിക്കുമെന്നും സര്ഗം വൈശ് മുന്നറിയിപ്പ് നല്കി. കഴിഞ്ഞ മൂന്ന് വര്ഷത്തെ തന്റെ അധ്വാനത്തിന്റെ ഫലമായ ‘അയി ഗിരിനന്ദിനി’ എന്ന ഗാനം ട്രെയ്ലറിന്റെ 1.08 മുതല് 1.30 സെക്കന്ഡ് വരെയുള്ള ഭാഗത്താണ് അനുമതിയില്ലാതെ ഉള്പ്പെടുത്തിയിരിക്കുന്നത്. അരുണാഭ് കുമാറിന്റെ രചനയില് ദീപക് മിശ്ര സംവിധാനം ചെയ്യുന്ന ചിത്രം സെപ്റ്റംബര് 25-നാണ് തിയേറ്ററുകളില് എത്തുന്നത്.