മുഖ്യമന്ത്രി പിണറായി വിജയൻ ഇന്ന് രാവിലെ 11 മണിക്ക് മാധ്യമങ്ങളെ കാണും. സെക്രട്ടേറിയറ്റിലെ നോര്ത്ത് ബ്ലോക്ക് മീഡിയാ റൂമിലാണ് വാര്ത്താസമ്മേളനം നടക്കുക. ദ ഹിന്ദു ദിനപത്രത്തിലെ മുഖ്യമന്ത്രിയുടെ അഭിമുഖവുമായി ബന്ധപ്പെട്ട പിആര് ഏജന്സി വിവാദം ഉള്പ്പെടെ നിലനില്ക്കെയാണ് മുഖ്യമന്ത്രിയുടെ വാര്ത്താസമ്മേളനം. കഴിഞ്ഞ ദിവസങ്ങളില് നടത്തിയ പൊതുപരിപാടികളില് ഉള്പ്പെടെ പിആര് ഏജന്സിയെക്കുറിച്ച് പരാമര്ശിക്കാതെയായിരുന്നു മുഖ്യമന്ത്രി പ്രതികരിച്ചത്. അതോടൊപ്പം എഡിജിപി എംആര് അജിത് കുമാറിനെ ക്രമസമാധാന ചുമതലയിൽ നിന്ന് നീക്കുന്നതിന് സിപിഐ സമ്മര്ദം കടുപ്പിച്ച സാഹചര്യത്തിൽ ഇക്കാര്യത്തിലുള്ള മുഖ്യമന്ത്രിയുടെ നിലപാടും നിര്ണായകമാണ്. എഡിജിപിക്കെതിരായ അന്വേഷണ റിപ്പോര്ട്ട് ഡിജിപി ഇന്ന് സമര്പ്പിക്കാനിരിക്കെയാണ് മുഖ്യമന്ത്രിയുടെ വാര്ത്താസമ്മേളനം. പിആര്ഡി ഉണ്ടായിരിക്കെ പിആര് ഏജന്സി ഉപയോഗിച്ചതിനെതിരെ പ്രതിപക്ഷം ഉള്പ്പെടെ രൂക്ഷ വിമര്ശനം ഉന്നയിച്ചിരുന്നു.