വടകര എല്ഡിഎഫ് സ്ഥാനാര്ത്ഥി കെകെ ശൈലജയ്ക്ക് യുഡിഎഫ് സ്ഥാനാര്ത്ഥി ഷാഫി പറമ്പിലിന്റെ വക്കീല് നോട്ടീസ്. ഇരുപത്തിനാല് മണിക്കൂറിനകം വാര്ത്താസമ്മേളനം വിളിച്ച് മാപ്പ് പറഞ്ഞില്ലെങ്കില് നിയമനടപടിയിലേക്ക് കടക്കുമെന്ന് ഷാഫി പറമ്പില് അറിയിച്ചു. ശൈലജയെ അപകീര്ത്തിപ്പെടും വിധത്തിലുള്ള വീഡിയോ പ്രചരിപ്പിച്ചുവെന്ന ആരോപണമാണ് ഷാഫി പറമ്പിലിന് നേരെ ഉയര്ന്നിരുന്നത്. തനിക്കെതിരായി മോശം വീഡിയോ പ്രചരിപ്പിക്കുന്നുവെന്ന് കാട്ടി ശൈലജ പൊലീസിന് പരാതിയും നല്കിയിരുന്നു. എന്നാല് വീഡിയോയെ കുറിച്ച് താൻ പറഞ്ഞിട്ടില്ല, മുഖം വെട്ടിയൊട്ടിച്ച് വികൃതമാക്കിയ പോസ്റ്ററിനെ കുറിച്ചാണ് പറഞ്ഞതെന്ന് ശൈലജ വ്യക്തമാക്കിയതോടെയാണ് ഷാഫി പറമ്പിൽ വക്കീല് നോട്ടീസ് അയച്ചത്.
