പാലിയേറ്റീവ് പരിചരണം സാര്വത്രികമാക്കുന്നതിന്റെ ഭാഗമായി മന്ത്രിമാരുടെ നേതൃത്വത്തിൽ ഉന്നത തലയോഗം ചേർന്നു. ആരോഗ്യ വകുപ്പ് മന്ത്രി വീണാ ജോര്ജ്, തദ്ദേശ സ്വയംഭരണ വകുപ്പ് മന്ത്രി എം ബി. രാജേഷ് എന്നിവരുടെ നേതൃത്വത്തില് ആണ് യോഗം ചേര്ന്നത്. മുഖ്യമന്ത്രി പ്രഖ്യാപിച്ച സാര്വത്രിക പാലിയേറ്റീവ് കെയര് സേവനത്തിനായി തയ്യാറാക്കിയ ഒന്നാം ഘട്ട പദ്ധതിയുടെ മാര്ഗനിര്ദേശങ്ങള് യോഗം ചര്ച്ച ചെയ്ത് അന്തിമ രൂപമാക്കി. പാലിയേറ്റീവ് കെയര് സേവനങ്ങള് ഏകോപിപ്പിക്കുന്നതിനായി സംസ്ഥാന ആരോഗ്യ വകുപ്പിന്റെ ‘കേരള കെയര്’പാലിയേറ്റീവ് കെയര് ഗ്രിഡിന്റെ പ്രകാശനം കഴിഞ്ഞ ദിവസം മുഖ്യമന്ത്രി നിര്വഹിച്ചിരുന്നു. സംസ്ഥാനത്തെ സര്ക്കാര്, സന്നദ്ധ മേഖലകളില് പ്രവര്ത്തിക്കുന്ന മുഴുവന് പാലിയേറ്റീവ് കെയര് യൂണിറ്റുകളേയും ഏകോപിപ്പിച്ച് കൊണ്ട് കിടപ്പ് രോഗികള്ക്ക് മികച്ച സാന്ത്വന പരിചരണ സേവനങ്ങള് നല്കുന്നതിന് വേണ്ടിയാണ് പാലിയേറ്റീവ് കെയര് ഗ്രിഡ് രൂപീകരിച്ചിരിക്കുന്നത്.
