ചേലക്കരയിലും പാലക്കാടും തിരഞ്ഞെടുപ്പ് ചുമതലയുളള നേതാക്കള് അനാവശ്യമായി വയനാട്ടിലേക്ക് വരേണ്ടതില്ലെന്ന് കെപിസിസി കര്ശന നിര്ദേശം നല്കി. പാലക്കാട്ടെയും ചേലക്കരയിലെയും തെരഞ്ഞെടുപ്പ് നിരീക്ഷണത്തിന് മുതിര്ന്ന നേതാക്കളെ ചുമതലപ്പെടുത്തി. ചേലക്കരയിലെ തിരഞ്ഞെടുപ്പ് നിരീക്ഷകരായി തിരുവഞ്ചൂര് രാധാകൃഷ്ണനെയും കൊടിക്കുന്നില് സുരേഷിനെയുമാണ് നിയോഗിച്ചിരിക്കുന്നത്. ബെന്നി ബഹനാനും കെസി ജോസഫുമാണ് പാലക്കാട്ടെ നിരീക്ഷകര്. തിരഞ്ഞെടുപ്പ് ചുമതലയുളള നേതാക്കള് കൃത്യമായും അതത് മണ്ഡലങ്ങളില് ഉണ്ടെന്ന് ഉറപ്പു വരുത്തേണ്ട ഉത്തരവാദിത്തം നിരീക്ഷകര്ക്കാണ്. പ്രിയങ്കയുടെ മല്സരമായതിനാല് എഐസിസി ഭാരവാഹികളുടെ നേരിട്ടുളള നിരീക്ഷണത്തിലാണ് വയനാട്. കെപിസിസി ഭാരവാഹികള്ക്കും സമീപ ജില്ലകളിലെ ഡിസിസി പ്രസിഡന്റുമാര്ക്കും പഞ്ചായത്ത് തലത്തിലാണ് ചുമതലകള് വീതിച്ചു നല്കിയത്. പാര്ട്ടിയുടെ അഞ്ച് എംഎല്എമാര്ക്ക് മാത്രമാണ് വയനാട്ടില് ചുമതല. ബാക്കിയുളളവര് ചേലക്കരയിലും പാലക്കാട്ടുമായി ഉണ്ടാകണമെന്നാണ് കെപിസിസിയുടെ നിർദേശം .
