വന്യമൃഗ ശല്യം രൂക്ഷമായ ജനവാസ പ്രദേശങ്ങൾ ഹോട്ട്സ് പോട്ടാക്കി നിരീക്ഷണം ശക്തിപ്പെടുത്തുമെന്ന് മന്ത്രി എ കെ ശശീന്ദ്രന്. കളക്ടറേറ്റില് നടന്ന ഉന്നതല യോഗത്തില് സംസാരിക്കുകയായിരുന്നു മന്ത്രി. ജനവാസ മേഖലകളില് ഇറങ്ങുന്ന വന്യമൃഗങ്ങളെ തിരിച്ചറിയാന് അന്തര് സംസ്ഥാന ഫോഴ്സുകളുടെ സഹകരണത്തോടെ കൂട്ടായ നടപടി സ്വീകരിക്കുമെന്നും അന്തര് സംസ്ഥാനത്തെ മന്ത്രിതല കൗണ്സില് യോഗം അടിയന്തരമായി ചേരുമെന്നും മന്ത്രി യോഗത്തില് അറിയിച്ചു. വന മേഖലയിലെ നിരീക്ഷണം ശക്തിപ്പെടുത്താന് വനം, പൊലീസ്, സന്നദ്ധസേന വോളണ്ടിയര്മാരുടെ സേവനം ഉപയോഗപ്പെടുത്തി ശക്തിപ്പെടുത്തും. പഞ്ചാരക്കൊല്ലിയിലെ നരഭോജി കടുവക്കായുള്ള തെരച്ചിലിന് എട്ടുപേര് അടങ്ങുന്ന 10 ടീമുകളിലായി 80 പേരാണ് രാവും പകലും പട്രോളിങ് നടത്തുന്നത്. പ്രശ്ന ബാധിത സ്ഥലങ്ങളില് വന്യജീവികളുടെ സഞ്ചാരം നിരീക്ഷിക്കാന് പെരിയാര് കടുവാ സങ്കേതത്തില് നിന്നും നിരീക്ഷണ ക്യാമറകള് എത്തിക്കും.
