മഹീന്ദ്ര ഗ്രൂപ്പിന്റെ ഉപ കമ്പനിയായ ക്ലാസിക് ലെജന്ഡ്സ് ജാവ 42 ഓള് സ്റ്റാര്സ് എഡിഷന് ഇന്ത്യന് വിപണിയില് പുറത്തിറക്കി. 1.85 ലക്ഷം രൂപയാണ് ഇതിന്റെ പ്രാരംഭ വില. ബാറ്റില് ഗ്രീന്, നെബുല ബ്ല്യൂ, മോസ് ഗ്രേ, ഐവറി, ബ്ലാക്ക് എന്നി കളറുകളില് പുതിയ മോട്ടോര്സൈക്കിള് വിപണിയില് ലഭ്യമാണ്. കളര് ഓപ്ഷനുകളില് ബ്ലാക്ക് കളറിനാണ് ഏറ്റവുമധികം വില. 1.90 ലക്ഷം രൂപയാണ് എക്സ് ഷോറൂം വില. മെക്കാനിക്കലായി നോക്കുമ്പോള് റെഗുലര് മോഡലിന് സമാനമാണ് ജാവാ 42 ഓള് സ്റ്റാര്സ്. 294 സിസി, ലിക്വിഡ് കൂള്ഡ് സിംഗിള് സിലിണ്ടര് എന്ജിന് ആണ് ഇതിന് കരുത്തുപകരുന്നത്. 7950 ആര്പിഎമ്മില് 26.9 ബിഎച്ച്പി കരുത്തും 6000 ആര്പിഎമ്മില് 26.8 എന്എം ടോര്ക്കും ഉല്പ്പാദിപ്പിക്കാന് കഴിയുന്നതാണ് എന്ജിന്. ഈ എന്ജിന് ആറ് സ്പീഡ് ഗിയര്ബോക്സുമായി ബന്ധിപ്പിച്ചിരിക്കുന്നു.
