മുഖ്യമന്ത്രി പിണറായി വിജയന് കത്തയച്ച് രമേശ് ചെന്നിത്തല. വയനാട് പൂക്കോട് വെറ്ററിനറി സര്വ്വകലാശാലയിലെ എസ്എഫ്ഐ ഗുണ്ടകളുടെ അതിക്രൂര മര്ദ്ദനത്തെ തുടര്ന്ന് മെന്സ് ഹോസ്റ്റലിലെ ശുചിമുറിയില് തൂങ്ങി മരിച്ചതായി കണ്ടെത്തിയ സിദ്ധാര്ത്ഥന് എന്ന ഒരു പാവപ്പെട്ട വിദ്യാര്ത്ഥിയെ അതിഭീകരവും, അതിക്രൂരവുമായ ശാരീരിക അക്രമത്തിനും, പീഢനത്തിനും, അപമാനത്തിനും വിധേയമാക്കിയ എസ്എഫ്ഐയുടെ കാട്ടാള സംഘത്തെ സംരക്ഷിക്കാനും ചേര്ത്ത് പിടിക്കാനും സര്ക്കാര് നടത്തിയ നാണംകെട്ട ശ്രമം, സംസ്കാര സമ്പന്നമായ കേരളത്തിലെ മുഴുവന് മലയാളികളെയും ലജ്ജിപ്പിക്കുക തന്നെ ചെയ്യുമെന്ന് കത്തിൽ വ്യക്തമാക്കുന്നു. ഈ പ്രതികളെ, അവര് എസ്എഫ്ഐ നേതാക്കളാണ് എന്ന ഒറ്റക്കാരണത്താല്, സംരക്ഷിച്ചതുകൊണ്ടാണ്, കോട്ടയത്ത് നടന്നത് പോലുള്ള കൊടും ക്രൂരറാഗിങ്ങ് സംഭവങ്ങള് വീണ്ടും ആവര്ത്തിക്കുന്നതെന്നും കത്തിലുണ്ട്. ഇനി കേരളത്തില് ഒരു മാതാപിതാക്കളുടെയും കണ്ണീര് വീഴരുതെന്നും സിദ്ധാര്ത്ഥന്റെ മാതാപിതാക്കളോട് മുഖ്യമന്ത്രി പരസ്യമായി മാപ്പ് പറയണമെന്നും രമേശ് ചെന്നിത്തല കത്തിൽ വ്യക്തമാക്കുന്നു.
