പശ്ചിമേഷ്യയില്‍ വീണ്ടും ഉടലെടുത്ത സംഘര്‍ഷങ്ങളുടെ പശ്ചാത്തലത്തില്‍ ആഗോള കണ്ടെയ്നര്‍ ചരക്കുകൂലി നിരക്കുകളില്‍ 130 ശതമാനം വര്‍ധന രേഖപ്പെടുത്തിയതായി ജെഫ്രീസ് പുറത്തുവിട്ട റിപ്പോര്‍ട്ടില്‍ വ്യക്തമാക്കുന്നു. ഇന്ത്യയുടെ കണ്ടെയ്നര്‍ അധിഷ്ഠിത കയറ്റുമതി-ഇറക്കുമതി വ്യാപാരം ശക്തമായ വളര്‍ച്ച കൈവരിക്കുന്ന വേളയിലാണ് നിരക്ക് വര്‍ധന വലിയ വെല്ലുവിളിയാകുന്നത്. സെപ്റ്റംബര്‍ മാസത്തില്‍ ഇന്ത്യയുടെ കണ്ടെയ്നര്‍ കയറ്റുമതി-ഇറക്കുമതി മേഖല മികച്ച വളര്‍ച്ചയാണ് രേഖപ്പെടുത്തിയത്. വാര്‍ഷികാടിസ്ഥാനത്തില്‍ ഈ മേഖലയിലെ വ്യാപാര മൂല്യം 23 ശതമാനം വര്‍ധിച്ചു. ഇതില്‍ കയറ്റുമതിയില്‍ 22 ശതമാനവും ഇറക്കുമതിയില്‍ 23 ശതമാനവും വളര്‍ച്ചയുണ്ടായി. ചരക്കുകൂലിയിലുണ്ടാകുന്ന വര്‍ധന ഇന്ത്യന്‍ കയറ്റുമതിക്കാരുടെ ലാഭമാര്‍ജിനെ ബാധിച്ചേക്കാം.