പ്രമുഖ കാര് നിര്മ്മാതാക്കളായ റെനോ ഇന്ത്യ തങ്ങളുടെ ചെറുകാറായ ക്വിഡിന്റെ പുതിയ ഫെയ്സ്ലിഫ്റ്റ് പതിപ്പ് പുറത്തിറക്കി. മുന്പത്തെ മോഡലിനെ അപേക്ഷിച്ച് ഡിസൈനില് വലിയ മാറ്റങ്ങളില്ലെങ്കിലും, സുരക്ഷയിലും വേരിയന്റുകളിലും ചില പ്രധാന അപ്ഡേറ്റുകള് വന്നിട്ടുണ്ട്. 4.53 ലക്ഷം രൂപ (എക്സ് ഷോറൂം) മുതലാണ് വില ആരംഭിക്കുന്നത്. മുന്പ് ലഭ്യമല്ലാതിരുന്ന 6 എയര്ബാഗുകള് ഇപ്പോള് സുരക്ഷയ്ക്കായി ഇതില് ഉള്പ്പെടുത്തിയിട്ടുണ്ട്. ഇപ്പോള് ഇവല്യൂഷന്, ക്ലൈംബര് എന്നീ രണ്ട് വേരിയന്റുകളില് മാത്രമാണ് ഈ വാഹനം ലഭ്യമാകുക. മുന്വശത്ത് മാറ്റങ്ങളൊന്നുമില്ല. പുതിയ റെനോ ലോഗോ, പുതിയ 14-ഇഞ്ച് അലോയ് വീലുകള്, പിന്നില് ചെറുതായി മാറ്റിയ ടെയില് ലൈറ്റ് ഹൗസിംഗ് എന്നിവയാണ് പ്രധാന മാറ്റങ്ങള്. ഔദ്യോഗികമായി കമ്പനി നല്കുന്ന സിഎന്ജി കിറ്റ് 70,449 രൂപ അധികം നല്കി ഈ കാറിനൊപ്പം സ്വന്തമാക്കാവുന്നതാണ്. 67 ബിഎച്പി കരുത്തും 91 എന്എം ടോര്ക്കും നല്കുന്ന 1.0 ലിറ്റര്, 3-സിലിണ്ടര് എന്ജിന് തന്നെയാണ് ഇതിലുള്ളത്. ഇത് 5-സ്പീഡ് മാനുവല്, എഎംടി ഗിയര്ബോക്സുകളുമായി വരുന്നു.
