ഗവർണറോടുള്ള പോരാട്ടത്തിന്റെ ഭാഗമെന്നോണം നിയമസഭാ സമ്മേളനം പിരിഞ്ഞതായി ഗവർണറെ അറിയിക്കില്ല എന്ന് റിപ്പോർട്ടുകൾ. ഇന്നലെ പിരിഞ്ഞ സഭാ സമ്മേളനത്തിന്റെ തുടർച്ചയായി വീണ്ടും സമ്മേളനം ചേരും. അടുത്ത മാസവും ബജറ്റ് സമ്മേളനം ചേരും. നയ പ്രഖ്യാപന പ്രസംഗം ഒഴിവാക്കിയിട്ടായിരിക്കും ബജറ്റ് സമ്മേളനം ചേരുക.
ഗവർണ്ണറുടെ നയപ്രഖ്യാപന പ്രസംഗത്തോടെയാണ് പുതു വർഷത്തെ ആദ്യത്തെ നിയമസഭാ സമ്മേളനം നടക്കേണ്ടത്. കഴിഞ്ഞ നയപ്രഖ്യാപന തലേന്ന് സമ്മർദത്തിലാക്കിയതിന്‍റെ തുടര്‍ച്ച പ്രതീക്ഷിച്ചു കൊണ്ടാണ് സർക്കാർ നീക്കം. സഭ പിരിയുന്നതായി മന്ത്രിസഭ അറിയിക്കാത്തതിനാൽ പഴയ സമ്മേളനത്തിന്റെ തുടർച്ചയായി കണക്കാക്കും. എന്നാൽ ഗവർണ്ണറെ പൂർണ്ണമായി ഒഴിവാക്കാനാവില്ല. അടുത്ത വർഷം എപ്പോൾ സഭ പുതുതായി ചേർന്നാലും ഗവർണറുടെ നയപ്രഖ്യാപന പ്രസംഗം വേണ്ടിവരും.