ഇന്ത്യയുടെ വിദേശ നാണയശേഖരം നവംബര്‍ 11ന് സമാപിച്ചവാരം രേഖപ്പെടുത്തിയത് ഒരു വര്‍ഷത്തിനിടയിലെ ഏറ്റവും വലിയ വര്‍ദ്ധന. 1,473 കോടി ഡോളറിന്റെ വര്‍ദ്ധനയുമായി 54,472 കോടി ഡോളറാണ് വിദേശ നാണയശേഖരമെന്ന് റിസര്‍വ് ബാങ്കിന്റെ റിപ്പോര്‍ട്ട് വ്യക്തമാക്കി. നവംബര്‍ നാലിന് സമാപിച്ച ആഴ്ചയില്‍ ശേഖരം 52,999 കോടി ഡോളറായിരുന്നു. അതേസമയം, ശേഖരം ഇപ്പോഴും 2022ന്റെ തുടക്കത്തിനെ അപേക്ഷിച്ച് 8,500 കോടി ഡോളറോളം കുറവാണ്. ഡോളറിനെതിരെ രൂപയുടെ മൂല്യത്തകര്‍ച്ചയുടെ ആക്കംകുറയ്ക്കാന്‍ റിസര്‍വ് ബാങ്ക് വന്‍തോതില്‍ ഡോളര്‍ വിറ്റൊഴിഞ്ഞതാണ് ഇതിനുകാരണം. നവംബര്‍ 11ന് സമാപിച്ചവാരം അമേരിക്കയില്‍ നാണയപ്പെരുപ്പം കുറയുകയും ഡോളറിനെതിരെ രൂപയുടെ മൂല്യം മെച്ചപ്പെടുകയും ചെയ്തതോടെയാണ് വിദേശ നാണയശേഖരം വീണ്ടും ഉയര്‍ച്ചയുടെ ട്രാക്കിലേറിയത്. വിദേശ കറന്‍സി ആസ്തി 1,180 കോടി ഡോളര്‍ ഉയര്‍ന്ന് 48,253 കോടി ഡോളറായി. കരുതല്‍ സ്വര്‍ണശേഖരം 264 കോടി ഡോളര്‍ മുന്നേറി 3,970 കോടി ഡോളറിലുമെത്തി.