ഇന്ത്യന്‍ വിപണിയില്‍ കരിസ്മ എക്സ്എംആര്‍ ലോഞ്ച് ചെയ്യാനുള്ള ഒരുക്കത്തിലാണ് ഹീറോ മോട്ടോകോര്‍പ്പ്. ഇതിന് മുമ്പ് കമ്പനി ഇപ്പോള്‍ ഹീറോ ഗ്ലാമറിന്റെ പുതുക്കിയ പതിപ്പ് രാജ്യത്ത് അവതരിപ്പിച്ചു. 2023 ഹീറോ ഗ്ലാമര്‍ 125 സിസി ഡ്രം, ഡിസ്‌ക് എന്നിങ്ങനെ രണ്ട് വേരിയന്റുകളില്‍ ലഭ്യമാണ് . യഥാക്രമം 82,348 രൂപയും 86,348 രൂപയുമാണ് ഇവയുടെ ദില്ലി എക്‌സ്-ഷോറൂം വില. 2023 ഹീറോ ഗ്ലാമര്‍ 125 സിസി കാന്‍ഡി ബ്ലേസിംഗ് റെഡ്, ടെക്‌നോ ബ്ലൂ-ബ്ലാക്ക്, സ്‌പോര്‍ട്‌സ് റെഡ്-ബ്ലാക്ക് എന്നിങ്ങനെ മൂന്ന് കളര്‍ ഓപ്ഷനുകളില്‍ ലഭ്യമാണ്. പൂര്‍ണ്ണ ഡിജിറ്റല്‍ ക്ലസ്റ്റര്‍, തത്സമയ മൈലേജ് ഇന്‍ഡിക്കേറ്റര്‍, കുറഞ്ഞ ഇന്ധന സൂചകം, സംയോജിത യുഎസ്ബി ചാര്‍ജര്‍ എന്നിവയുമായാണ് പുതിയ ഗ്ലാമര്‍ വരുന്നത്. 7500 ആര്‍പിഎമ്മില്‍ 7.97 കിലോവാട്ടും 6000 ആര്‍പിഎമ്മില്‍ 10.6 എന്‍എം പീക്ക് ടോര്‍ക്കും ഉല്‍പ്പാദിപ്പിക്കുന്ന ഒബിഡി2-ഇ20 കംപ്ലയിന്റ് 125 സിസി എഞ്ചിനാണ് ഇതിന് കരുത്തേകുന്നത്. 63 കിലോമീറ്റര്‍ ഇന്ധനക്ഷമതയാണ് മോട്ടോര്‍സൈക്കിള്‍ വാഗ്ദാനം ചെയ്യുന്നത്.