◾ആരെയും പറ്റിച്ചിട്ടില്ലെന്നും നിക്ഷേപകരുടെ പണം തിരിച്ചുനല്‍കുമെന്നും സേഫ് ആന്‍ഡ് സ്ട്രോംഗ് തട്ടിപ്പുകേസിലെ പ്രതി പ്രവീണ്‍ റാണ. ബിസിനസ് മാത്രമാണ് താന്‍ ചെയ്തത്. പണം പലര്‍ക്കായി വായ്പ നല്കി. വ്യാപാര പങ്കാളിയായ ഷൗക്കത്തിന് നല്‍കിയ 16 കോടി രൂപയും അര ഏക്കര്‍ സ്ഥലവും വീണ്ടെടുക്കുമെന്നാണ് മൊഴി. വിവാഹമോതിരം കോയമ്പത്തൂരില്‍ 75,000 രൂപയ്ക്കു വിറ്റ് പാറമടയില്‍ കാവി വസ്ത്രമണിഞ്ഞാണ് ഇയാള്‍ കഴിഞ്ഞത്. അന്യസംസ്ഥാന തൊഴിലാളിയുടെ ഫോണില്‍നിന്ന് വീട്ടിലേക്കു വിളിച്ചതോടെയാണ് പോലീസ് പാറമടയിലെത്തി പിടികൂടിയത്. പ്രവീണിനു ബിനാമി നിക്ഷേപങ്ങള്‍ ഉണ്ടോയെന്നു പരിശോധിക്കുന്നുണ്ട്.
◾പച്ചമുട്ട ചേര്‍ത്ത മയൊണൈസ് നിരോധിച്ചു. പാസ്റ്റണേസ് മുട്ട ഉപയോഗിക്കാം. വെജിറ്റബിള്‍ മയൊണൈസും ഉപയോഗിക്കാം. ഭക്ഷണം പാകം ചെയ്യുന്നവര്‍ക്കും വിതരണക്കാര്‍ക്കും ഹെല്‍ത്ത് കാര്‍ഡ് വേണം. ഓരോ സ്ഥാപനത്തിലും ഫുഡ് സേഫ്റ്റി സൂപ്പര്‍വൈസര്‍ ഉണ്ടാകണം. പാഴ്സലുകളില്‍ സമയം രേഖപ്പെടുത്തുകയും സ്റ്റിക്കര്‍ വേണമെന്നും ആരോഗ്യമന്ത്രി വീണ ജോര്‍ജ് പറഞ്ഞു. പച്ചമുട്ട ചേര്‍ത്ത മയണൈസ് തയാറാക്കില്ലെന്ന് കഴിഞ്ഞ ദിവസം ബേക്കറി, ഹോട്ടല്‍ ഉടമകളുടെ യോഗം തീരുമാനിച്ചിരുന്നു.
◾ഫെബ്രുവരിയില്‍ സംസ്ഥാനത്ത് സര്‍വകലാശാലകളില്‍ തൊഴില്‍ മേളകള്‍ സംഘടിപ്പിക്കുമെന്ന് ഉന്നത വിദ്യാഭ്യാസ വകുപ്പ് മന്ത്രി ഡോ. ആര്‍. ബിന്ദു. കലാലയങ്ങളിലെ കരിയര്‍ ഗൈഡന്‍സ്, പ്ലേസ്മെന്റ് സെല്ലുകളുടെ പ്രവര്‍ത്തനം ശക്തിപ്പെടുത്തുമെന്നും മന്ത്രി പറഞ്ഞു. ഉന്നത വിദ്യാഭ്യാസ സ്ഥാപനങ്ങളിലെ പ്ലേസ്മെന്റ് ഓഫിസര്‍മാര്‍ക്കായി സംഘടിപ്പിച്ച ഏകദിന പരിശീലന പരിപാടി ഉദ്ഘാടനം ചെയ്യുകയായിരുന്നു മന്ത്രി.
*നാടിനും നഗരത്തിനും കെ.എസ്.എഫ്.ഇ. ഭദ്രത സ്മാര്‍ട്ട് ചിട്ടികള്‍*
നിരവധി സമ്മാനപദ്ധതികള്‍ കോര്‍ത്തിണക്കി കൊണ്ട് ആവിഷ്‌ക്കരിച്ച ചിട്ടി പദ്ധതിയാണ് കെ.എസ്.എഫ്.ഇ. ഭദ്രത സ്മാര്‍ട്ട് ചിട്ടികള്‍ 2022. ബംബര്‍ സമ്മാനമായി 1 കോടി വിലയുള്ള ഫ്‌ലാറ്റ്/ വില്ല അല്ലെങ്കില്‍ 1കോടി രൂപ ഒരാള്‍ക്ക് സമ്മാനമായി നല്‍കുന്നു. മേഖലാ തല സമ്മാനങ്ങളായി 70ഇലക്ട്രിക് കാറുകള്‍ (Tata Tigor EV XE)അല്ലെങ്കില്‍ പരമാവധി 12.50ലക്ഷം രൂപ വീതം 70പേര്‍ക്കും കൂടാതെ 100ഹോണ്ട ഇലക്ട്രിക് സ്‌ക്കൂട്ടറുകള്‍ അല്ലെങ്കില്‍ പരമാവധി 75000/-രൂപ വീതം 100 പേര്‍ക്കും ലഭിക്കുന്നതാണ്. ഉടന്‍ തന്നെ അടുത്തുള്ള കെ.എസ്.എഫ്.ഇ. ശാഖ സന്ദര്‍ശിക്കൂ. ചിട്ടിയില്‍ അംഗമാകൂ.
*ksfe.com/offers/ksfe-bhadratha-smart-chits-2022*
◾സര്‍വകലാശാലകളെ തകര്‍ക്കാന്‍ ചിലര്‍ ശ്രമിക്കുന്നുണ്ടെന്ന് ഗവര്‍ണര്‍ ആരിഫ് മുഹമ്മദ് ഖാന്‍. കെടിയുവില്‍ അടക്കം വിസിയുടെ പ്രവര്‍ത്തനങ്ങള്‍ക്കു നിയന്ത്രണം ഏര്‍പ്പെടുത്തുന്നത് ശരിയല്ല. ആത്യന്തികമായി ദോഷം വിദ്യാര്‍ഥികള്‍ക്കാണെന്നും ഗവര്‍ണര്‍ പറഞ്ഞു.
◾ഒരു സമുദായ നേതാവിനെയും അപ്പോയിന്റ്മെന്റ് എടുത്ത് കണ്ടതല്ലെന്നു ശശി തരൂര്‍ എംപി. കാണണമെന്ന് ആവശ്യപ്പെട്ടപ്പോള്‍ കണ്ടതാണ്. മുഖ്യമന്ത്രി സ്ഥാനാര്‍ത്ഥി ചര്‍ച്ച ഇപ്പോള്‍ തുടങ്ങുന്നതില്‍ പ്രസക്തിയില്ല. കേരളം കര്‍മഭൂമിയാണെന്നും തരൂര്‍ പറഞ്ഞു.
◾ശശി തരൂരിന്റെ സന്ദര്‍ശനങ്ങളിലും പരിപാടികളിലും ലീഗ് പ്രത്യേക പ്രാധാന്യം നല്‍കുന്നില്ലെന്ന് പി കെ കുഞ്ഞാലിക്കുട്ടി. കോണ്‍ഗ്രസിന്റെ ആഭ്യന്തര കാര്യത്തില്‍ ഇന്നുവരെ ഇടപെട്ടിട്ടില്ല. മുഖ്യമന്ത്രി സ്ഥാനാര്‍ഥിക്കാര്യത്തില്‍ ലീഗ് അഭിപ്രായം പറഞ്ഞിട്ടില്ലെന്നും കുഞ്ഞാലിക്കുട്ടി പറഞ്ഞു.
*ജോയ്ആലുക്കാസ് വിശേഷങ്ങള്‍*
ജോയ്ആലുക്കാസിലെ എല്ലാ സ്വര്‍ണാഭരണങ്ങള്‍ക്കും ഇപ്പോള്‍ പണിക്കൂലിയില്‍ വന്‍ ഇളവ്. സ്വര്‍ണം, ഡയമണ്ട്, മറ്റു ജ്വല്ലറി കളക്ഷനുകളെല്ലാം സ്വര്‍ണ വിപണിയിലെ തന്നെ ഏറ്റവും കുറഞ്ഞ പണിക്കൂലിയിലാണ് ലഭ്യമാക്കുന്നത്. ജോയ്ആലുക്കാസില്‍ നിന്ന് പര്‍ച്ചേയ്സ് ചെയ്യുന്ന ആഭരണങ്ങള്‍ക്ക് ഒരു വര്‍ഷത്തേക്ക് സൗജന്യ ഇന്‍ഷുഷറന്‍സും ലൈഫ്ടൈം ഫ്രീ മെയിന്റനന്‍സും ലഭിക്കുന്നതാണ്. ഒപ്പം എക്സ്ചേഞ്ച് ഓഫറും പ്രയോജനപ്പെടുത്താവുന്നതാണ്.
◾വഴിയില്‍ കിടന്ന മദ്യക്കുപ്പിയിലെ മദ്യം കഴിച്ച മൂന്നു യുവാക്കളില്‍ ഒരാള്‍ മരിച്ചു. അടിമാലി പടയാട്ടില്‍ കുഞ്ഞുമോനാണ് (40) മരിച്ചത്. അനില്‍കുമാര്‍, മനോജ് എന്നിവര്‍ ആശുപത്രിയിലാണ്. മദ്യത്തില്‍ കീടനാശിനിയുടെ സാന്നിധ്യം കണ്ടെത്തിയിരുന്നു. സുഹൃത്തിനു ലഭിച്ച മദ്യക്കുപ്പി യുവാക്കള്‍ക്കു കൈമാറുകയായിരുന്നു.
◾മര്‍ദ്ദനമേറ്റെന്നു പരാതിയുമായി എത്തിയ യുവാവിനെക്കൊണ്ട് തല്ലിയ ആളിനെ പൊലീസ് തിരിച്ചു തല്ലിച്ചെന്ന് പരാതി. കൊല്ലം അഞ്ചാലുംമൂട് എസ് ഐ ജയശങ്കറിനെതിരെയാണ് ആരോപണം. പരാതി പരിഹരിക്കുന്നതിനായി സ്റ്റേഷനില്‍ വിളിപ്പിച്ചപ്പോഴായിരുന്നു എസ് ഐയുടെ വിചിത്ര നടപടിയെന്ന് തൃക്കരിവ സ്വദേശി സെബാസ്റ്റ്യന്‍ നല്‍കിയ പരാതിയില്‍ പറയുന്നു.
◾കലോത്സവത്തിലെ സ്വാഗത ഗാന വിവാദം തലയില്‍ കെട്ടും തോക്കുമായി അവതരിപ്പിച്ചു എന്നതിന്റെ പേരിലാണെന്ന് കേന്ദ്രമന്ത്രി വി. മുരളീധരന്‍. താലിബാന്റേയും ഐഎസിന്റെയും ആളുകളാണ് തലയില്‍ കെട്ടുമായി നടക്കുന്നത്. കേരളത്തിലെ മുസ്ലിങ്ങളെയല്ല ഇങ്ങനെ അവതരിപ്പിച്ചത്. താലിബാന്റേയും ഐഎസിന്റേയും വക്താക്കളായിട്ടാണോ മന്ത്രി മുഹമ്മദ് റിയാസും മുസ്ലിം ലീഗും സംസാരിക്കുന്നതെന്നും അദ്ദേഹം ചോദിച്ചു.
◾കളമശ്ശേരിയില്‍ 500 കിലോ പഴകിയ മാംസം പിടികൂടി. കൈപ്പട മുകളിലെ വീട്ടില്‍ നിന്നാണ് ഹോട്ടലുകളിലേക്കു ഷവര്‍മ തയാറാക്കി വിതരണം ചെയ്യാന്‍ സൂക്ഷിച്ച ഇറച്ചി പിടികൂടിയത്. തമിഴ്നാട്ടില്‍നിന്നാണ് അഴുകിയ ഇറച്ചി കൊണ്ടുവന്നതെന്നാണ് പരിശോധന നടത്തിയ കളമശ്ശേരി നഗരസഭ ആരോഗ്യ വിഭാഗം ഉദ്യോഗസ്ഥര്‍ പറയുന്നു.
◾യുപിഎ സര്‍ക്കാര്‍ കേരളത്തിനു നല്‍കിയതിനേക്കാള്‍ കൂടുതല്‍ പണം മോദി സര്‍ക്കാര്‍ നല്‍കുന്നുണ്ടെന്ന് ബിജെപി നേതാവ് പ്രകാശ് ജാവ്ദേക്കര്‍. യുപിഎ 32 ശതമാനമായിരുന്നു സഹായം നല്‍കിയിരുന്നതെങ്കില്‍ ഇപ്പോള്‍ ജിഎസ്ടി ഏര്‍പ്പെടുത്തിയശേഷം 42 ശതമാനം നല്‍കുന്നുണ്ട്. ജാവ്ദേക്കര്‍ പറഞ്ഞു.
◾മൂന്നാറില്‍ താപനില പൂജ്യത്തിനു താഴെ. ഇന്നലെയും പൂജ്യത്തിനു താഴെയായിരുന്നു. സൈലന്റ് വാലി ഗൂഡാര്‍വിള, ചെണ്ടുവര, വട്ടവട തുടങ്ങിയ സ്ഥലങ്ങളിലാണ് അതിശൈത്യമുള്ളത്.
◾ശബരിമല തീര്‍ഥാടകരുമായി വന്ന ബസ് കോഴിക്കോട് ഫറോക്ക് പഴയ പാലത്തിന്റെ കമാനത്തില്‍ ഇടിച്ചു തകര്‍ന്നു. കര്‍ണാടകയില്‍നിന്നുള്ള തീര്‍ത്ഥാടകരുടെ വാഹനമാണ് അപകടത്തില്‍പ്പെട്ടത്. ബസിന്റെ മുകള്‍ഭാഗം പൂര്‍ണമായി തകര്‍ന്നു. 30 തീര്‍ത്ഥാടകര്‍ വാഹനത്തിലുണ്ടായിരുന്നു.
◾കരിപ്പൂര്‍ വിമാനത്താവളത്തിലൂടെ കടത്താന്‍ ശ്രമിച്ച 2.55 കോടി രൂപയുടെ സ്വര്‍ണം കസ്റ്റംസ് പിടികൂടി. 4.65 കിലോ വരുന്ന സ്വര്‍ണ്ണവുമായി കാപ്പാട് സ്വദേശിയായ ഇസ്മയില്‍, അരിമ്പ്ര സ്വദേശിയായ അബ്ദു റൗഫ് എന്നിവരാണ് പിടിയിലായത്. എയര്‍ കാര്‍ഗോ കോംപ്ലക്സ് വഴി റൈസ് കുക്കര്‍, എയര്‍ ഫ്രൈയര്‍, ജ്യൂസ് മേക്കര്‍ എന്നിവയിലൂടെയാണു സ്വര്‍ണം കടത്താന്‍ ശ്രമിച്ചത്.
◾തനിച്ചു താമസിക്കുന്ന വയോധികയുടെ പന്ത്രണ്ടര സെന്റ് ഭൂമിയും 17 പവന്‍ സ്വര്‍ണവും രണ്ടുലക്ഷം രൂപയും തട്ടിയെടുത്തതിന് നെയ്യാറ്റിന്‍കര നഗരസഭയിലെ സിപിഎം കൗണ്‍സിലര്‍ക്കും ഭാര്യയ്ക്കുമെതിരെ കേസ്. തവരവിള വാര്‍ഡ് കൗണ്‍സിലര്‍ സുജിനും ഭാര്യ ഗീതുവിനും എതിരെയാണ് പരാതി. മാരായമുട്ടം പോലീസ് ഇരുവര്‍ക്കുമെതിരെ കേസെടുത്തു.
◾കരുനാഗപ്പള്ളിയിലെ ലഹരി കടത്ത് കേസില്‍ പ്രതികള്‍ക്കു ജാമ്യം. ആലപ്പുഴ സ്വദേശികളായ ഇജാസ്, സജാദ് കരുനാഗപ്പള്ളി സ്വദേശികളായ ഷമീര്‍, തൗസീം എന്നിവരെയാണ് കരുനാഗപ്പള്ളി ഒന്നാം ക്ലാസ് ജുഡീഷ്യല്‍ മജിസ്ട്രേറ്റ് കോടതി ജാമ്യത്തില്‍ വിട്ടത്.
◾കൊച്ചിയില്‍ കൊടി തോരണം കഴുത്തില്‍ കുടുങ്ങി ബൈക്ക് യാത്രക്കാരന് പരിക്ക്. കൊച്ചി താലൂക്ക് ഓഫിസിലെ ജീവനക്കാരന്‍ സിബുവിനാണ് പരിക്കേറ്റത്. കൊച്ചിന്‍ കാര്‍ണിവലിന്റെ തോരണം കഴുത്തില്‍ കുടുങ്ങുകയായിരുന്നു.
◾ഇരുചക്ര വാഹനങ്ങള്‍ മോഷ്ടിച്ച കേസില്‍ തണ്ടേക്കാട് കിഴക്കന്‍ വീട്ടില്‍ മുഹമ്മദ് റിസ്വാന്‍ (33) പെരുമ്പാവൂര്‍ പൊലീസിന്റെ പിടിയിലായി.
◾സര്‍ക്കാര്‍ ചെലവില്‍ പത്രങ്ങളില്‍ പാര്‍ട്ടി പരസ്യം നല്‍കിയതിന് ഡല്‍ഹി മുഖ്യമന്ത്രി അരവിന്ദ് കെജ്രിവാള്‍ 164 കോടി രൂപ തിരിച്ചടയ്ക്കണമെന്നു നോട്ടീസ്. ഗവര്‍ണറുടെ നിര്‍ദേശം അനുസരിച്ച് ഡയറക്ടറേറ്റ് ഓഫ് ഇന്‍ഫര്‍മേഷന്‍ ആന്‍ഡ് പബ്ലിസിറ്റി ആണ് നോട്ടീസ് നല്‍കിയത്. 10 ദിവസത്തിനകം തുക അടയ്ക്കണം.
◾ജഡ്ജി നിയമനത്തിനു സുപ്രീം കോടതി കൊളീജിയം ആവര്‍ത്തിച്ച് നല്‍കുന്ന ശുപാര്‍ശകള്‍ അംഗീകരിക്കാന്‍ കേന്ദ്രം ബാധ്യസ്ഥരാണെന്ന് സര്‍ക്കാരിനു കത്തു നല്കി. ജൂഡീഷ്യറിക്കും സര്‍ക്കാരിനുമിടയിലെ ഏറ്റമുട്ടല്‍ രൂക്ഷമാകുന്നതിനിടെ കോടതിക്കെതിരായ ഉപരാഷ്ട്രപതിയുടെ വിമര്‍ശനം ലോക്സഭാ സ്പീക്കറും ആവര്‍ത്തിച്ചു.
◾സ്വാമി വിവേകാനന്ദന്റെ 160 ാം ജന്മവാര്‍ഷികത്തില്‍ യുവജനദിനാശംസകളുമായി പ്രധാനമന്ത്രി നരേന്ദ്ര മോദിയും രാഷ്ട്രപതി ദ്രൗപതി മുര്‍മുവും. സ്വാമി വിവേകാനന്ദന്റെ ഉപദേശങ്ങള്‍ യുവജനങ്ങളെ പ്രചോദിപ്പിക്കുമെന്ന് പ്രസിഡന്റ് ദ്രൗപതി മുര്‍മു പറഞ്ഞു.
◾ഇന്ത്യ – ചൈന അതിര്‍ത്തിയില്‍ സ്ഥിതി ശാന്തമാണെങ്കിലും സാഹചര്യങ്ങള്‍ പ്രവചനാതീതമെന്ന് കരസേന മേധാവി ജനറല്‍ മനോജ് പാണ്ഡെ. ഇന്ത്യന്‍ സൈന്യം സജ്ജമാണ്. അതിര്‍ത്തിയില്‍ സമാധാനം ഉറപ്പാക്കാന്‍ സൈനിക തലത്തിലും നയതന്ത്ര തലത്തിലും ചര്‍ച്ചകള്‍ തുടരുകയാണെന്നും ജനറല്‍ മനോജ് പാണ്ഡെ പറഞ്ഞു.
◾ടിവി ചര്‍ച്ചയ്ക്കിടെ പ്രവാചക വിരുദ്ധ പരാമര്‍ശം നടത്തിയ ബിജെപി മുന്‍ വക്താവ് നുപുര്‍ ശര്‍മയ്ക്കു തോക്കു കൈവശം വയ്ക്കാന്‍ ഡല്‍ഹി പോലീസ് അനുമതി നല്കി. ജീവനു ഭീഷണിയുണ്ടെന്നും തോക്കു കൈവശം വയ്ക്കാന്‍ അനുമതി വേണമെന്നും ആവശ്യപ്പെട്ട് നുപുര്‍ ശര്‍മ അപേക്ഷ നല്‍കിയിരുന്നു.
◾ഇന്ത്യക്കെതിരായ രണ്ടാം ഏകദിനത്തില്‍ ടോസ് നേടിയ ശ്രീലങ്ക ബാറ്റിംഗ് തിരഞ്ഞെടുത്തു. ആദ്യ ഏകദിനത്തില്‍ വിജയിച്ച ഇന്ത്യക്ക് ഈ മത്സരത്തില്‍ ജയിച്ചാല്‍ പരമ്പര സ്വന്തമാക്കാം.
◾പ്രവാസികള്‍ക്ക് ഇന്റര്‍നാഷനല്‍ മൊബൈല്‍ നമ്പര്‍ ഉപയോഗിച്ച് യൂണിഫൈഡ് പേയ്‌മെന്റ് ഇന്റര്‍ഫെയ്‌സ് (യുപിഐ) വഴി പണമിടപാടു നടത്താന്‍ അനുമതി. യുഎഇയും സൗദി അറേബ്യയും ഉള്‍പ്പെടെ പത്തു രാജ്യങ്ങളിലെ പ്രവാസികള്‍ക്കാണ് അനുമതിയെന്ന് നാഷനല്‍ പേയ്‌മെന്റ് കോര്‍പ്പറേഷന്‍ അറിയിച്ചു. ഈ രാജ്യങ്ങളിലെ എന്‍ആഇ, എന്‍ആര്‍ഒ അക്കൗണ്ട് ഉള്ള പ്രവാസികള്‍ക്ക് ഇനി ഗൂഗിള്‍ പേ, ഫോണ്‍ പേ തുടങ്ങിയ യുപിഐ സര്‍വീസുകള്‍ ഉപയോഗിച്ച് ഇടപാടു നടത്താം. ആദ്യഘട്ടമെന്ന നിലയിലാണ് പത്തു രാജ്യങ്ങളിലെ പ്രവാസികള്‍ക്ക് ഈ സൗകര്യം ഒരുക്കുന്നത്. സിംഗപ്പൂര്‍, ഓസ്‌ട്രേലിയ, കാനഡ, ഹോങ്കോങ്, ഒമാന്‍, ഖത്തര്‍, യുഎസ്എ, സൗദി അറേബ്യ, യുഎഇ, യുകെ എന്നിവയാണ് യുപിഐ സംവിധാനം അനുവദിക്കപ്പെട്ട രാജ്യങ്ങള്‍. കൂടുതല്‍ രാജ്യങ്ങളിലെ പ്രവാസികള്‍ക്ക് ഉടന്‍ തന്നെ ഈ സൗകര്യം അനുവദിക്കുമെന്ന് പേയ്‌മെന്റ് കോര്‍പ്പറേഷന്‍ അറിയിച്ചു. ഇതുസംബന്ധിച്ച മാറ്റങ്ങള്‍ വരുത്താന്‍ ബാങ്കുകള്‍ക്ക് ഏപ്രില്‍ 30വരെയാണ് നാഷണല്‍ പേയ്‌മെന്റ് കോര്‍പറേഷന്‍ സമയം അനുവദിച്ചിരിക്കുന്നത്.
◾മൊബൈല്‍ ഇന്റര്‍നെറ്റ് വേഗതയില്‍ ലോകത്ത് ഒന്നാമതെത്തി ഖത്തര്‍. ഓക്ലയുടെ സ്പീഡ്ടെസ്റ്റ് ഗ്ലോബല്‍ ഇന്‍ഡക്സ് പുറത്തിറക്കിയ ലിസ്റ്റ് അനുസരിച്ച് 2022 നവംബറില്‍ ഖത്തറിലെ ശരാശരി ഡൗണ്‍ലോഡ് വേഗം 176.18 എം.ബി.പി.എസും അപ്ലോഡ് വേഗം 25.13 എം.ബി.പി.എസുമായിരുന്നു. രണ്ടാം സ്ഥാനത്തെത്തിയ യു.എ.ഇയുടെ ശരാശരി ഡൗണ്‍ലോഡ് സ്പീഡ് നവംബറില്‍ 139.41 എം.ബി.പി.എസായിരുന്നു. 2021 നവംബറില്‍ ഒന്നാം സ്ഥാനത്തായിരുന്ന യു.എ.ഇയെ പിന്തള്ളിയാണ് ഇക്കുറി ഖത്തര്‍ മുകളിലെത്തിയത്. കഴിഞ്ഞ ലിസ്റ്റില്‍ ഖത്തര്‍ മൂന്നാം സ്ഥാനത്തായിരുന്നു. 131.54 എം.ബി.പി.എസ് ഡൗണ്‍ലോഡ് വേഗവുമായി നോര്‍വെ മൂന്നാമതെത്തിയപ്പോള്‍ ദക്ഷിണ കൊറിയ 118.76 എം.ബി.പി.എസ് ഡൗണ്‍ലോഡ് വേഗവുമായി നാലാം സ്ഥാനത്തെത്തി. ഡെന്മാര്‍ക്ക് (113.44 എം.ബി.പി.എസ്), ചൈന (109.40 എം.ബി.പി.എസ്), നെതര്‍ലന്‍ഡ്സ് (109.06 എം.ബി.പി.എസ്), മക്കാവു (106.38 എം.ബി.പി.എസ്), ബള്‍ഗേറിയ (103.29 എം.ബി.പി.എസ്), ബ്രൂണെ (102.36 എം.ബി.പി.എസ്) എന്നീ രാജ്യങ്ങളാണ് യഥാക്രമം അഞ്ചു മുതല്‍ പത്തുവരെ സ്ഥാനങ്ങളില്‍. പുതിയ ലിസ്റ്റിലെ ആദ്യപത്തില്‍ ഡെന്മാര്‍ക്ക്, മക്കാവു, ബ്രൂണെ എന്നിവ ഇടംപിടിച്ചപ്പോള്‍ 2021ലെ പട്ടികയിലുണ്ടായിരുന്ന സൗദി അറേബ്യ, സൈപ്രസ്, കുവൈത്ത് എന്നിവ പുറത്തായി.
◾ലോകസിനിമാ ചരിത്രത്തിലെ നാഴികക്കല്ലായ ചിത്രമാണ് ടൈറ്റാനിക്. ചരിത്ര സംഭവത്തെ ആസ്പദമാക്കി വിഖ്യാത സംവിധായകന്‍ ജെയിംസ് കാമറൂണ്‍ ഒരുക്കിയ ഈ സിനിമ എക്കാലത്തെയും ഒരു വിസ്മയമായിരുന്നു. റിലീസ് ചെയ്ത് രണ്ടര പതിറ്റാണ്ട് പിന്നിട്ട സാഹചര്യത്തില്‍ വീണ്ടും ടൈറ്റാനിക്ക് തിയേറ്ററിലേക്ക് എത്തിക്കാന്‍ ഒരുങ്ങുന്നുവെന്ന വാര്‍ത്തയാണ് അണിയറപ്രവര്‍ത്തകര്‍ പുറത്ത് വിട്ടിരിക്കുന്നത്.4 കെ 3 ഡിയിലേക്ക് റീമാസ്റ്ററിങ് നടത്തിയാണ് ഇത്തവണ ചിത്രം തിയേറ്ററിലേക്കെത്തുക. പുതിയ ട്രെയിലറും അണിയറപ്രവര്‍ത്തകര്‍ പുറത്ത് വിട്ടു. ഫെബ്രുവരി 10 ന് ടൈറ്റാനിക് ലോകമെമ്പാടുമുള്ള തിയേറ്ററുകളില്‍ 4 കെ. 3 ഡിയിലേക്ക് റീമാസ്റ്റര്‍ ചെയ്ത കോപ്പി റിലീസിനെത്തും. 1997 ലാണ് ക്രിസ്മസ് റിലീസായി ആദ്യമായി ചിത്രം പ്രേക്ഷകരിലേക്കെത്തിയത്.
◾നവ്യാ നായര്‍ നായികയാകുന്ന പുതിയ ചിത്രത്തിന് പേരിട്ടു. അനീഷ് ഉപാസന സംവിധാനം ചെയ്യുന്ന ചിത്രത്തിന് ‘ജാനകി ജാനേ..’ എന്നാണ് പേരിട്ടിരിക്കുന്നത്. സൈജു കുറുപ്പാണ് മറ്റൊരു കഥാപാത്രത്തെ അവതരിപ്പിക്കുന്നത്. ചിത്രത്തിന്റെ ഫസ്റ്റ് ലുക്കും പുറത്തുവിട്ടിട്ടുണ്ട്. കാറളം ഗ്രാമത്തിലെ ഒരു പ്രിന്റിംഗ് പ്രസ് ജീവനക്കാരിയായ ‘ജാനകി’യുടെ കഥയാണ് ഈ ചിത്രം പറയുന്നത്. അവളുടെ ജീവിതത്തില്‍ ഒരിക്കലുണ്ടായ ഒരു സംഭവം പിന്നീട് അവരുടെ ജീവിതത്തിലിന്നും വേട്ടയാടപ്പെടുന്നു. പിഡബ്ള്യൂഡി സബ് കോണ്‍ട്രാക്റായ ‘ഉണ്ണി’ അവളുടെ ജീവിതത്തിലേക്കു കടന്നുവരികയും പിന്നീടവര്‍ വിവാഹിതരാവുകയും ചെയ്തു. വിവാഹ ജീവിതത്തിലും ആ സംഭവം ആവര്‍ത്തിക്കപ്പെടുന്നു. ഈ സംഘര്‍ഷങ്ങള്‍ തികച്ചും നര്‍മ്മത്തിന്റെ മുഹൂര്‍ത്തങ്ങളിലൂടെ അവതരിപ്പിക്കുകയാണ് ചിത്രത്തിലൂടെ. തികഞ്ഞ ഗ്രാമീണ പശ്ചാത്തലത്തിലൂടെ വളരെ റിയലിസ്റ്റിക്കായിട്ടാണ് അനീഷ് ഉപാസന ഈ ചിത്രത്തെ ഒരുക്കുന്നത്.
◾കോംപാക്ട് എസ്യുവി വിഭാഗത്തില്‍ തരംഗം സൃഷ്ടിക്കാന്‍ മാരുതി സുസുക്കിയുടെ 5 ഡോര്‍ ജിമ്നി ഓട്ടോ എക്സ്പോയില്‍ അരങ്ങേറ്റം നടത്തി. ഇന്ത്യയിലും മറ്റു രാജ്യങ്ങളിലും പരീക്ഷണയോട്ടം നടത്തിയിരുന്ന ജിംനിയുടെ 5 ഡോര്‍ പതിപ്പ് ലോകത്തില്‍ ആദ്യമായി ഡല്‍ഹി ഓട്ടോ എക്സ്പോ 2023ലാണ് മാരുതി അവതരിപ്പിച്ചിരിക്കുന്നത്. 4 വീല്‍ ഡ്രൈവ്, ഓള്‍ ഗ്രിപ് പ്രോ, ലാഡര്‍ ഫ്രെയിം ഷാസി തുടങ്ങിയ സംവിധാനങ്ങളോടെയാണ് ഓട്ടോ എക്സ്പോയില്‍ ജിമ്നി വരവറിയിച്ചത്. 3 ലിങ്ക് റിജിഡ് ആക്സില്‍ സസ്പെന്‍ഷനുള്ള വാഹനത്തില്‍ 1.5 ലിറ്റര്‍ കെ സീരീസ് എഞ്ചിനാണ് വരുന്നത്. ലാഡര്‍ ഫ്രെയിം ഷാസി സുസുകി ടെക്ട് പ്ളാറ്റ്ഫോമിലാണ്. 210 എംഎം ഗ്രൗണ്ട് ക്ളിയറന്‍സാണ് വാഹനത്തിനുള്ളത്. 199 രാജ്യങ്ങളില്‍ 3.2 ദശലക്ഷം യൂണിറ്റുകളാണ് ഇതുവരെ വിറ്റുപോയിരിക്കുന്നു. പേള്‍ വൈറ്റ്, ബ്ളൂയിഷ് ബ്ളാക്ക്, നെക്സ ബ്ളൂ, ഗ്രനൈറ്റ് ഗ്രേ, സിസ്ലിങ് റെഡ് കളര്‍ ഓപ്ഷനുകളിലാണ് ലഭ്യമാകുക. നെക്സ ഡീലര്‍ഷിപ്പുകളില്‍ വാഹനത്തിന്റെ ബുക്കിങ് കമ്പനി തുടങ്ങിയിട്ടുമുണ്ട്.
◾രണ്ടു കൊലപാതകങ്ങളുടെ ചുരുളഴിയുന്ന കുറ്റാന്വേഷണ നോവല്‍. കണ്ണ് മൂടിക്കെട്ടിയിട്ടും നീതി നടപ്പിലാക്കുന്ന തെമിസ് എന്ന നീതിദേവത. അന്വേഷണങ്ങളിലേക്ക് ഇറങ്ങിച്ചെല്ലുമ്പോള്‍ പരിചിതരായവരെ കണ്ടുമുട്ടിയാല്‍ അത് തികച്ചും യാദൃച്ഛികംമാത്രമാണ്. അതിഭീകരതയൊന്നും അവകാശപ്പെടാനില്ലാത്ത, ഒറ്റയിരിപ്പിന് വായിച്ചു തീര്‍ക്കാന്‍ പ്രേരിപ്പിക്കുന്ന നോവല്‍. നീതിയെയും നിയമത്തെയും ഒരു നാണയത്തിന്റെ ഇരുപുറമായി ചിത്രീകരിക്കുന്ന നോവല്‍. നിരാലംബയായ ഒരു പെണ്‍കുട്ടി അനുഭവിക്കേണ്ടിവന്ന നരകയാതന കറുത്ത മഷിയാല്‍ അടയാളപ്പെടുത്തുന്നു. ‘തെമിസ്’. എ.എം ബഷീര്‍. ഡിസി ബുക്സ്. വില 427 രൂപ.
◾തണുപ്പുകാലത്തെ അസുഖങ്ങളില്‍ നിന്ന് മുക്തി നേടാന്‍ മുട്ട കഴിക്കാം. ജലദോഷം, തുമ്മല്‍, ചുമ, പനി, മുടികൊഴിച്ചില്‍, ചര്‍മപ്രശ്നങ്ങള്‍, രക്തചംക്രമണം മന്ദഗതിയിലാകല്‍, എല്ലുകള്‍ക്കും സന്ധികള്‍ക്കും വേദന ഈ പ്രശ്നങ്ങളെയെല്ലാം ഭക്ഷണക്രമത്തിലെ ചെറിയ മാറ്റങ്ങള്‍ കൊണ്ട് നേരിടാം. മഞ്ഞുകാലത്ത് ദിവസവും രണ്ട് മുട്ട വീതം കഴിക്കുന്നത് ഇത്തരം ആരോഗ്യപ്രശ്നങ്ങള്‍ക്കെല്ലാം പരിഹാരമാകും. മുട്ടയിലെ പ്രോട്ടീന്‍ ശരീരത്തിന്റെ കരുത്തും പ്രതിരോധശേഷിയും വര്‍ധിപ്പിക്കും. വൈറ്റമിന്‍ ബി6, ബി12 എന്നിവ ജലദോഷം, പനി തുടങ്ങിയ ബുദ്ധിമുട്ടികളില്‍ നിന്ന് നമ്മളെ സംരക്ഷിക്കും,. മുട്ടയിലെ വൈറ്റമിന്‍ ഡിയും സിങ്കും എല്ലുകള്‍ക്കും വളരെ പ്രയോജനപ്രദമാണ്. ലുടെയ്ന്‍, സിയസാന്തിന്‍ തുടങ്ങിയ ഘടകങ്ങളെ വര്‍ധിപ്പിച്ച് എല്ലുകളെ കരുത്തുറ്റതാക്കാന്‍ ഇത് സഹായിക്കും. തണുപ്പ് തുടങ്ങിയാല്‍ സൂര്യപ്രകാശം ഏല്‍ക്കുന്നത് സ്വാഭാവികമായും കുറയുന്നതുകൊണ്ട് ശരീരത്തിന് ലഭിക്കുന്ന വൈറ്റമിന്‍ ഡിയുടെ അളവും കുറയും. 8.2 മൈക്രോഗ്രാം വൈറ്റമിന്‍ ഡിയാണ് ഒരു മുട്ടയില്‍ അടങ്ങിയിരിക്കുന്നത്. പ്രതിദിനം 10 മൈക്രോഗ്രാം വൈറ്റമിന്‍ ഡിയാണ് ശുപാര്‍ശ ചെയ്യപ്പെടുന്നത്. ഒരു മുട്ട കഴിക്കുമ്പോള്‍ വേണ്ടതിന്റെ 82 ശതമാനം വൈറ്റമിന്‍ ഡി ശരീരത്തിന് ലഭിക്കും. തണുപ്പുകാലത്തെ മുടുകൊഴിച്ചില്‍ തടയാന്‍ മുട്ടയില്‍ അടങ്ങിയിരിക്കുന്ന പ്രോട്ടീന്‍ സഹായിക്കും. ചര്‍മത്തിന്റെയും നഖത്തിന്റെയും ആരോഗ്യത്തിന് അവശ്യമായ ബയോട്ടിനും മുട്ടയില്‍ നിന്ന് ലഭിക്കും.
*ഇന്നത്തെ വിനിമയ നിരക്ക്*
ഡോളര്‍ – 81.66, പൗണ്ട് – 99.15, യൂറോ – 87.82, സ്വിസ് ഫ്രാങ്ക് – 87.50, ഓസ്‌ട്രേലിയന്‍ ഡോളര്‍ – 56.25, ബഹറിന്‍ ദിനാര്‍ – 216.63, കുവൈത്ത് ദിനാര്‍ -267.01, ഒമാനി റിയാല്‍ – 212.10, സൗദി റിയാല്‍ – 21.74, യു.എ.ഇ ദിര്‍ഹം – 22.23, ഖത്തര്‍ റിയാല്‍ – 22.43, കനേഡിയന്‍ ഡോളര്‍ – 60.71.