ഇലക്ട്രിക് വാഹന വിപണിയിലേക്ക് റോയല്‍ എന്‍ഫീല്‍ഡിന്റെ ആദ്യ വാഹനം നവംബര്‍ 4ന് വിപണിയിലെത്തും. പുറത്തിറക്കുന്നതിന് മുന്നോടിയായി പുതിയ ബൈക്കിന്റെ അവസാന ഘട്ട പരീക്ഷണയോട്ടങ്ങള്‍ നടത്തുന്ന ചിത്രങ്ങള്‍ പുറത്തുവന്നു. പുതിയ ബൈക്ക് പാരച്യൂട്ടില്‍ ഇറക്കുന്നതുപോലുള്ള ടീസര്‍ വിഡിയോ നേരത്തെ കമ്പനി പുറത്തുവിട്ടിരുന്നു. നിലവില്‍ വിപണിയിലുള്ള ഇലക്ട്രിക് ബൈക്കുകളില്‍ നിന്ന് വ്യത്യസ്തമായി റെട്രോ ലുക്കിലായിരിക്കും റോയല്‍ എന്‍ഫീല്‍ഡിന്റെ ബൈക്ക്. റൗണ്ട് എല്‍ഇഡി ഹെഡ്ലാംപ്, എല്‍ഇഡി ടേണ്‍ ഇന്‍ഡിക്കേറ്ററുകള്‍, അഡ്ജസ്റ്റബിള്‍ ബ്രേക്ക് ലിവറുകള്‍, വൃത്താകൃതിയിലുള്ള ഇന്‍സ്ട്രമെന്റ് ക്ലസ്റ്റര്‍, ടിഎഫ്ടി സ്‌ക്രീന്‍ തുടങ്ങിയവയുണ്ടാകും. അധികം വലുപ്പമില്ലാത്ത രൂപത്തിലുള്ള സിറ്റി മോട്ടോര്‍സൈക്കിളാണ് റോയല്‍ എന്‍ഫീല്‍ഡ് ആദ്യം പുറത്തിറക്കുക. ബൈക്കിന്റെ റേഞ്ച്, ബാറ്ററി, മറ്റ് പ്രത്യേകതകള്‍ എന്നിവ സംബന്ധിച്ച വിവരങ്ങളൊന്നും കമ്പനി ഔദ്യോഗികമായി പുറത്തുവിട്ടിട്ടില്ല. യുകെയിലും ഇന്ത്യയിലുമായാണ് ഇലക്ട്രിക് ബൈക്ക് വികസിപ്പിക്കുന്നത്.