പൊതു പരീക്ഷകളുടെ ചോദ്യപ്പേപ്പറുകൾ ചോരുന്നത് തടയാനുളള പൊതു പരീക്ഷാ നിയമത്തിന്റെ ചട്ടങ്ങള് കേന്ദ്ര സര്ക്കാര് പുറത്തിറക്കി. പരീക്ഷാ നടത്തിപ്പില് പ്രശ്നങ്ങള് കണ്ടെത്തിയാല് ആദ്യം പരാതി നല്കേണ്ടത് പരീക്ഷാ സെന്ററിന്റെ ചുമതലക്കാരനായ ഉദ്യോഗസ്ഥനെയാണ് കൂടാതെ റീജിയണല് ഓഫീസറുടെ റിപ്പോര്ട്ടും പരാതിയ്ക്കൊപ്പം നല്കണം. പരാതി ലഭിച്ചാല് ഉടൻ പ്രത്യേക സമിതിയുണ്ടാക്കി അന്വേഷണം നടത്തണം. ജോയിന്റ് സെക്രട്ടറി റാങ്കില് കുറയാത്ത ഉദ്യോഗസ്ഥനാകണം അന്വേഷണ സമിതിയുടെ അധ്യക്ഷന്. ഈ സമിതി നല്കുന്ന റിപ്പോര്ട്ടിന്റെ അടിസ്ഥാനത്തില് വേണം നടപടി സ്വീകരിക്കാൻ എന്നാണ് ചട്ടത്തിൽ വ്യക്തമാക്കുന്നത്.
