മിഖ സിങ് എന്ന പേരും പഞ്ചാബി ഗാനങ്ങളും പരിചിതമല്ലാത്തവര്‍ കുറവായിരിക്കും. ആഘോഷങ്ങള്‍ക്കു കൂടുതല്‍ താളം പകരുന്ന ഗായകന്റെ പാട്ടുകള്‍ക്ക് ഇന്ത്യ മുഴുവന്‍ ആരാധകരുണ്ട്. തന്റെ ഗായകസംഘത്തിലെ പ്രധാന ഗായികയ്ക്കു ആഡംബര എസ് യു വി സമ്മാനിച്ചാണ് ഇപ്പോള്‍ മിഖ സിങ് വാര്‍ത്തകളില്‍ നിറയുന്നത്. മെഴ്സിഡീസ് ബെന്‍സിന്റെ എം എല്‍ 250 എസ്യുവിയാണ് നിക്കി സിങ് എന്ന ഗായികയ്ക്കു മിഖയുടെ സമ്മാനം. വാഹനം സമ്മാനമായി നല്‍കിയതിന്റെ ചിത്രങ്ങള്‍ മിഖ സിങ്ങിന്റെ ആരാധകര്‍ നിയന്ത്രിക്കുന്ന സമൂഹമാധ്യമ പേജിലൂടെയാണ് പങ്കുവെയ്ക്കപ്പെട്ടത്. പോളാര്‍ വൈറ്റ് നിറത്തിലുള്ളതാണ് എസ്യുവി. ഇന്ത്യന്‍ വാഹന വിപണിയിലെ മെഴ്സിഡീസിന്റെ പ്രധാന മോഡലുകളില്‍ ഒന്നാണ് ബെന്‍സ് എം എല്‍ 250 സിഡിഐ. 2012 ലാണ് വാഹനം ഇന്ത്യയില്‍ പുറത്തിറങ്ങിയത്. ആഡംബരത്തിന്റെ മറുവാക്കായ വാഹനം രാജ്യത്തും വന്‍ഹിറ്റായിരുന്നു. 2012 ല്‍ 4600000 രൂപയായിരുന്നു വാഹനത്തിന്റെ വില. 3.0 ലീറ്റര്‍, വി 6 ഡീസല്‍ എസ്യുവിയുടെ കരുത്ത്. 204 ബി എച്ച് പി പവറും 500 എന്‍ എം ടോര്‍ക്കും ഉല്‍പാദിപ്പിക്കും ഈ എന്‍ജിന്‍. 7 ജി ട്രോണിക് പ്ലസ് ട്രാന്‍സ്മിഷനില്‍ 4 വീല്‍ ഡ്രൈവാണ്. 2023 ല്‍ മിഖ സിങ് തന്റെ ബാല്യകാല സുഹൃത്തിനു 80 ലക്ഷം രൂപ വിലവരുന്ന മെഴ്സിഡീസ് ബെന്‍സ് ജി എല്‍ ഇ 250 ഡി എസ് യു വി സമ്മാനമായി നല്‍കിയിരുന്നു. എസ് യു വികള്‍ ഇഷ്ടപ്പെടുന്ന താരത്തിന്റെ ഗാരിജില്‍ ഹമ്മര്‍ എച്ച് 2, റേഞ്ച് റോവര്‍ വോഗ് തുടങ്ങിയ വാഹനങ്ങളുമുണ്ട്.