പിണറായി വിജയനെ ചുമക്കുന്ന സിപിഎം അധഃപതനത്തിന്റെ നെല്ലിപ്പലകയിലെത്തിയെന്ന് കെ സുധാകരന്‍

പിണറായി വിജയനെ ചുമക്കുന്ന സിപിഎം അധഃപതനത്തിന്റെ നെല്ലിപ്പലകയിലെത്തിയെന്ന് കെപിസിസി പ്രസിഡന്റ് കെ സുധാകരന്‍ എംപി. മാസപടിയായി കിട്ടിയ നോട്ടുകെട്ടുകൾ കൊണ്ട് തയ്യാറാക്കിയ കിടക്കയിൽ കിടന്നുറങ്ങുന്ന ആളാണ് പിണറായി. പാവപ്പെട്ടവന്റെ ക്ഷേമപെൻഷനിൽ നിന്നുപോലും കയ്യിട്ടുവാരുന്ന നിങ്ങളെ ഓർത്ത് തലകുനിക്കുകയാണ് മലയാളി.ടിപി ചന്ദ്രശേഖരനെയും, ഷുഹൈബിനെയും, കൃപേഷിനെയും, ശരത്‌ലാലിനെയും, സിദ്ധാര്‍ത്ഥനെയും കൊലയ്ക്കുകൊടുത്ത അഭിനവ ഹിറ്റ്‌ലറാണ് പിണറായി വിജയൻ എന്നും കെ സുധാകരൻ പറഞ്ഞു. ബിജെപിയിലേക്ക് ആരെങ്കിലും പോയാല്‍ സുരേന്ദ്രനേക്കാള്‍ ആര്‍ത്തുല്ലസ്സിക്കുന്ന സംഘപരിവാര്‍ മനസ്സാണ് പിണറായി വിജയന്റേത്. കോൺഗ്രസ് പാർട്ടിയുടെ സ്ഥാനാർത്ഥി നിർണ്ണയം കഴിഞ്ഞപ്പോൾ വിളറി പിടിച്ചത് കൊണ്ടാണ് കോൺഗ്രസിനെ അപമാനിച്ച് പിണറായി വിജയൻ സംസാരിച്ചത് എന്നും കെ സുധാകരൻ വ്യക്തമാക്കി.