◾ഡല്‍ഹി എയിംസ് ആശുപത്രിയുടെ സെര്‍വര്‍ ഹാക്ക് ചെയ്തതിനെക്കുറിച്ച് ദേശീയ അന്വേഷണ ഏജന്‍സി അന്വേഷണം തുടങ്ങി. പ്രധാനമന്ത്രി നരേന്ദ്രമോദി, കേന്ദ്ര ആഭ്യന്തരമന്ത്രി അമിത് ഷാ, മുന്‍ പ്രധാനമന്ത്രി മന്‍മോഹന്‍ സിംഗ്, കോണ്‍ഗ്രസ് അധ്യക്ഷ സോണിയ ഗാന്ധി എന്നിവരടക്കം വിവിഐപികളുടെ ചികിത്സാ വിവരങ്ങള്‍ ഹാക്കു ചെയ്തവര്‍ ചോര്‍ത്തിയെന്നാണു സംശയം. നാലു കോടിയോളം രോഗികളുടെ വിവരങ്ങള്‍ സെര്‍വറിലുണ്ട്. ഹാക്കു ചെയ്തിട്ട് ഒരാഴ്ചയോളമായി. സെര്‍വറുകള്‍ പുനസ്ഥാപിക്കാന്‍ അഞ്ചു ദിവസം വേണ്ടിവരും.
◾വിഴിഞ്ഞം ആക്രമണത്തിന്റെ പശ്ചാത്തലത്തില്‍ സംസ്ഥാനത്തുടനീളം ജാഗ്രത നിര്‍ദ്ദേശം. തീരമേഖലകളില്‍ കൂടുതല്‍ കരുതലുണ്ടാകണമെന്നും നിര്‍ദേശിച്ചിട്ടുണ്ട്. എല്ലാ ജില്ലകളിലും പൊലീസ് വിന്യാസം നടത്താനാണ് ക്രമസമാധാന ചുമതലയുള്ള എഡിജിപി നിര്‍ദ്ദേശിച്ചത്. അവധിയിലുള്ള പൊലീസുകാര്‍ തിരിച്ചെത്തണമെന്നും നിര്‍ദ്ദേശമുണ്ട്.
◾
*നാടിനും നഗരത്തിനും കെ.എസ്.എഫ്.ഇ. ഭദ്രത സ്മാര്‍ട്ട് ചിട്ടികള്‍*
നിരവധി സമ്മാനപദ്ധതികള്‍ കോര്‍ത്തിണക്കി കൊണ്ട് ആവിഷ്‌ക്കരിച്ച ചിട്ടി പദ്ധതിയാണ് കെ.എസ്.എഫ്.ഇ. ഭദ്രത സ്മാര്‍ട്ട് ചിട്ടികള്‍ 2022. ബംബര്‍ സമ്മാനമായി 1 കോടി വിലയുള്ള ഫ്‌ലാറ്റ്/ വില്ല അല്ലെങ്കില്‍ 1കോടി രൂപ ഒരാള്‍ക്ക് സമ്മാനമായി നല്‍കുന്നു. മേഖലാ തല സമ്മാനങ്ങളായി 70ഇലക്ട്രിക് കാറുകള്‍ (Tata Tigor EV XE)അല്ലെങ്കില്‍ പരമാവധി 12.50ലക്ഷം രൂപ വീതം 70പേര്‍ക്കും കൂടാതെ 100ഹോണ്ട ഇലക്ട്രിക് സ്‌ക്കൂട്ടറുകള്‍ അല്ലെങ്കില്‍ പരമാവധി 75000/-രൂപ വീതം 100 പേര്‍ക്കും ലഭിക്കുന്നതാണ്.
ഉടന്‍ തന്നെ അടുത്തുള്ള കെ.എസ്.എഫ്.ഇ. ശാഖ സന്ദര്‍ശിക്കൂ. ചിട്ടിയില്‍ അംഗമാകൂ.
*ksfe.com/offers/ksfe-bhadratha-smart-chits-2022*
◾വിഴിഞ്ഞം തുറമുഖ നിര്‍മാണംമൂലം തീരശോഷണമുണ്ടായി സ്ഥലവും വീടും നഷ്ടപ്പെട്ട കുടുംബങ്ങളെ പുനരധിവസിപ്പിക്കാന്‍ തയാറാകാത്ത മുഖ്യമന്ത്രി രാജിവയ്ക്കണമെന്ന് വിഴിഞ്ഞം സമരസമിതി. മുഖ്യമന്ത്രിയുടെ വീട്ടില്‍ 45 ലക്ഷം രൂപ മുടക്കി തൊഴുത്തു പണിത സര്‍ക്കാര്‍ ഓഖി ദുരന്തത്തില്‍ മരിച്ച മത്സ്യത്തൊഴിലാളികളുടെ കുടുംബങ്ങള്‍ക്കു പ്രഖ്യാപിച്ച സഹായ വാഗ്ദാനം നല്‍കിയിട്ടില്ലെന്ന് വിഴിഞ്ഞം സമരസമിതി കണ്‍വീനര്‍ ഫാ. തിയോഡിഷ്യസ് ഡിക്രൂസ് ആരോപിച്ചു. സമരസമിതിയുടെ നേതൃത്വത്തില്‍ വഞ്ചനാദിനം ആചരിച്ചുകൊണ്ടുള്ള പൊതുസമ്മേളനം ഉദ്ഘാടനംചെയ്യുകയായിരുന്നു അദ്ദേഹം.
◾വിഴിഞ്ഞം തുറമുഖപദ്ധതിയുടെ ആവശ്യകത ബോധ്യപ്പെടുത്താനുള്ള ഏക്സ്പെര്‍ട്ട് സമ്മിറ്റ് പരിപാടിയില്‍ മുഖ്യമന്ത്രി പിണറായി വിജയന്‍ പങ്കെടുത്തില്ല. വിഴിഞ്ഞം സീ പോര്‍ട്ട് കമ്പനി മസ്‌കറ്റ് ഹോട്ടലില്‍ സംഘടിപ്പിച്ച പരിപാടി മുഖ്യമന്ത്രി ഉദ്ഘാടനം ചെയ്യും എന്നാണ് അറിയിച്ചിരുന്നത്. തൊണ്ടവേദന മൂലമാണ് മുഖ്യമന്ത്രി എത്താതിരുന്നതെന്ന് ഉദ്ഘാടനം ചെയ്ത ധനമന്ത്രി കെ.എന്‍. ബാലഗോപാലന്‍ പറഞ്ഞു. ശശി തരൂര്‍ എംപിയും പങ്കെടുത്തില്ല.
◾വിഴിഞ്ഞം തുറമുഖത്തിനെതിരായ സമരത്തെ രാജ്യസ്നേഹമുള്ള ആരും പിന്തുണയ്ക്കില്ലെന്ന് മന്ത്രി വി. അബ്ദുറഹിമാന്‍. സമരക്കാര്‍ക്ക് പിന്നില്‍ ആരാണ്? സര്‍ക്കാരിന് താഴുന്നതിന് ഒരു പരിധിയുണ്ട്. അടുത്ത വര്‍ഷം മലയാളിക്കുള്ള ഓണസമ്മാനമായി വിഴിഞ്ഞത്ത് ആദ്യ കപ്പലെത്തുമെന്നും മന്ത്രി അഹമ്മദ് ദേവര്‍കോവില്‍ അവകാശപ്പെട്ടു.
*ജോയ്ആലുക്കാസ് വിശേഷങ്ങള്‍*
ജോയ്ആലുക്കാസിലെ എല്ലാ സ്വര്‍ണാഭരണങ്ങള്‍ക്കും ഇപ്പോള്‍ പണിക്കൂലിയില്‍ വന്‍ ഇളവ്. സ്വര്‍ണം, ഡയമണ്ട്, മറ്റു ജ്വല്ലറി കളക്ഷനുകളെല്ലാം സ്വര്‍ണ വിപണിയിലെ തന്നെ ഏറ്റവും കുറഞ്ഞ പണിക്കൂലിയിലാണ് ലഭ്യമാക്കുന്നത്. ജോയ്ആലുക്കാസില്‍ നിന്ന് പര്‍ച്ചേയ്സ് ചെയ്യുന്ന ആഭരണങ്ങള്‍ക്ക് ഒരു വര്‍ഷത്തേക്ക് സൗജന്യ ഇന്‍ഷുഷറന്‍സും ലൈഫ്ടൈം ഫ്രീ മെയിന്റനന്‍സും ലഭിക്കുന്നതാണ്. ഒപ്പം എക്സ്ചേഞ്ച് ഓഫറും പ്രയോജനപ്പെടുത്താവുന്നതാണ്.
➖
◾സാങ്കേതിക സര്‍വകലാശാല വിസി നിയമനം റദ്ദാക്കിയ സുപ്രീംകോടതി വിധിക്കെതിരെ സംസ്ഥാന സര്‍ക്കാരും സുപ്രീം കോടതിയില്‍ പുനഃപരിശോധന ഹര്‍ജി നല്‍കി. വിധിക്കെതിരെ നേരത്തെ മുന്‍ വിസി ഡോ. രാജശ്രീയും പുനഃപരിശോധന ഹര്‍ജി നല്‍കിയിരുന്നു.
◾ശബരിമല യാത്രയില്‍ തടസങ്ങളുണ്ടാകാതിരിക്കാന്‍ നിലക്കല്‍ മുതല്‍ പമ്പ വരെ റോഡിരികില്‍ വാഹനങ്ങള്‍ പാര്‍ക്ക് ചെയ്യുന്നത് ഹൈക്കോടതി വിലക്കി. പമ്പ പൊലീസ് സ്റ്റേഷനിലെ ഉദ്യോഗസ്ഥര്‍ ഇക്കാര്യം ഉറപ്പാക്കണം. സ്പെഷല്‍ കമ്മീഷണര്‍ വെള്ളിയാഴ്ചക്കകം റിപ്പോര്‍ട്ട് സമര്‍പ്പിക്കണമെന്നും കോടതി.
◾രമ്യ ഹരിദാസ് എംപിയെ മൊബൈല്‍ ഫോണിലൂടെ വിളിച്ച് അസഭ്യം പറയുകയും ഭീഷണിപ്പെടുത്തുകയും ചെയ്തിരുന്ന കോട്ടയം എരുമേലി കണ്ണിമല സ്വദേശി വെണ്‍മാന്തറ ഷിബുക്കുട്ടനെ (48) വടക്കഞ്ചേരി പോലീസ് അറസ്റ്റു ചെയ്തു. നിരവധി തവണ താക്കീത് ചെയ്തിട്ടും ശല്യം തുടര്‍ന്നതോടെയാണ് എം.പി പോലീസില്‍ പരാതി നല്‍കിയത്.
◾തിരുവനന്തപുരം കോര്‍പറേഷനിലെ നിയമന കത്ത് വിവാദത്തിനു പിറകില്‍ ഭരണം അട്ടിമറിക്കാന്‍ ശ്രമിക്കുന്ന യുഡിഎഫ് – ബിജെപി കൂട്ടുകെട്ടാണെന്ന് സിപിഎം. നഗരസഭയിലെ ഡിവിഷനുകള്‍തോറും എല്‍ഡിഎഫ് പ്രചാരണം നടത്തും. ഇന്നും നാളെയുമാണ് പ്രചാരണ പരിപാടി.
◾തൃശൂര്‍ ഗവണ്‍മെന്റ് മെഡിക്കല്‍ കോളേജ് ഹോസ്റ്റലിലും രാത്രി വിലക്കിനെതിരെ വിദ്യാര്‍ഥിനികളുടെ പ്രതിഷേധം. സ്വാതന്ത്ര്യം അര്‍ദ്ധരാത്രിയില്‍ എന്ന പേരിലാണ് പ്രതിഷേധ കൂട്ടായ്മ. രാത്രി 9.30ന് മുന്‍പ് പെണ്‍കുട്ടികള്‍ ഹോസ്റ്റലില്‍ കയറണമെന്ന നിബന്ധനയ്ക്കെതിരേയാണ് പ്രതിഷേധം.
◾മദ്യപിച്ചെത്തിയ അയല്‍വാസിയുടെ കുത്തേറ്റ് അച്ഛനും മകനും മരിച്ചു. തൃശൂര്‍ ചേര്‍പ്പ് പല്ലിശേരിയിലാണ് സംഭവം. പല്ലിശേരി പനങ്ങാടന്‍ വീട്ടില്‍ ചന്ദ്രന്‍ (62), മകന്‍ ജിതിന്‍ കുമാര്‍ (32) എന്നിവരാണ് മരിച്ചത്.
◾ഫാഷന്‍ ഷോയുടെ മറവില്‍ മോഡലുകളില്‍നിന്ന് പണം വാങ്ങി റാംപില്‍നിന്ന് ഒഴിവാക്കിയെന്നും അപമര്യാദയായി പെരുമാറിയെന്നുമുള്ള പരാതിയില്‍ ലിസാറോ മോഡലിംഗ് കമ്പനി സ്ഥാപകന്‍ ജെനിലിനെ എറണാകുളത്ത് അറസ്റ്റു ചെയ്തു. ട്രാന്‍സ് വുമണ്‍ മോഡലിന്റെ പരാതിയിലാണ് അറസ്റ്റ്. ഇയാളെ പിന്നീടു ജാമ്യത്തില്‍ വിട്ടു.
◾കോട്ടയം നഗരത്തില്‍ കോളജ് വിദ്യാര്‍ഥിനിക്കുനേരെ ആക്രമണം നടത്തിയ മൂന്നംഗ സംഘത്തെ അറസ്റ്റു ചെയ്തു. ഇന്നലെ രാത്രി പത്തരയോടെയായിരുന്നു സംഭവം. വിദ്യാര്‍ത്ഥിനിയെ കളിയാക്കിയതു ചോദ്യം ചെയ്തതിനെത്തുടര്‍ന്നാണ് അക്രമം. കോട്ടയം താഴത്തങ്ങാടി സ്വദേശികളാണ് അറസ്റ്റിലായ യുവാക്കള്‍.
◾കിളിമാനൂരില്‍ മദ്യപിച്ച് ഹോട്ടലില്‍ അക്രമം നടത്തിയ കേസിലെ പ്രതികള്‍ അറസ്റ്റില്‍. പഴയകുന്നുമ്മേല്‍ വട്ടപ്പാറ ചരുവിള പുത്തന്‍വീട്ടില്‍ അമല്‍ (20), കിളിമാനൂര്‍ ചൂട്ടയില്‍ കാവുങ്കല്‍ വീട്ടില്‍ ശ്രീക്കുട്ടന്‍ (22), കിളിമാനൂര്‍ മലയാമഠം മണ്ഡപകുന്ന് അനിതാ ഭവനില്‍ മകന്‍ ഹരിഹരന്‍ (22) എന്നിവരെയാണ് കിളിമാനൂര്‍ പൊലീസ് അറസ്റ്റു ചെയ്തത്.
◾കോഴിക്കോട് – മലപ്പുറം ജില്ലാ അതിര്‍ത്തിയായ കോനൂര്‍കണ്ടിയില്‍ കാട്ടാന മൂന്നു വാഹനങ്ങള്‍ തകര്‍ത്തു. ആനയെ തുരത്താന്‍ ശ്രമിക്കുന്നതിനിടെ വീണ വനപാലകനു പരിക്കേറ്റു. പുലര്‍ച്ചെ രണ്ടരയോടെയാണ് കോനൂര്‍കണ്ടിയില്‍ ആനയിറങ്ങിയത്.
◾കോഴിക്കോട് നരിക്കുനിയില്‍ ഓടുന്ന ബസില്‍നിന്നു തെറിച്ചുവീണ യാത്രക്കാരി ബസിനടിയില്‍പ്പെട്ട് മരിച്ചു. ഒടുപാറയില്‍ വാടക വീട്ടില്‍ താമസിക്കുന്ന കൊയിലാണ്ടി സ്വദേശി ഉഷ (52) ആണ് മരിച്ചത്.
◾അട്ടപ്പാടിയില്‍ ഒഴുക്കില്‍പ്പെട്ടു കാണാതായ യുവാവിന്റെ മൃതദേഹം കണ്ടെത്തി. മട്ടത്തുക്കാട് കൊടങ്കരപ്പള്ളം മുറിച്ചു കടക്കുന്നതിനിടെ അഗളി ഭൂതിവഴി സ്വദേശി കുമരനാണ് മരിച്ചത്.
◾തമിഴ്നാട് സ്വദേശി 44 ലക്ഷം രൂപയുടെ കുഴല്‍പ്പണവുമായി പാലക്കാട് റെയില്‍വേ പോലീസിന്റെ പിടിയില്‍. മധുര ലക്ഷ്മിപുരം ഈസ്റ്റ് ഗേറ്റില്‍ താമസിക്കുന്ന ഗോപാല്‍ മകന്‍ ജി. രവി (52)യെയാണ് അറസ്റ്റു ചെയ്തത്.
◾കഞ്ചാവ് മാഫിയാ തലവന്മാരെ ഒറീസയിലെ വനത്തില്‍നിന്നു പിടികൂടി പൊലീസ്. തെന്നിന്ത്യന്‍ സംസ്ഥാനങ്ങളിലേക്ക് കഞ്ചാവ് വിതരണം ചെയ്യുന്ന സാംസണ്‍ ഗന്ധ (34), ഇസ്മയില്‍ ഗന്ധ (27) എന്നിവരെയാണ് അറസ്റ്റു ചെയ്തത്.
◾ബീഹാറിലെ കൈമൂര്‍ ജില്ലയില്‍ പതിനാലുകാരിയെ ആണ്‍കുട്ടികള്‍ തട്ടിക്കൊണ്ടുപോയി അവരിലൊരാളും സ്ഥലത്തെത്തിയ സ്‌കൂള്‍ ഹെഡ്മാസ്റ്ററും ബലാല്‍സംഗം ചെയ്തു. പ്രധാനാധ്യാപകനായ സുരേന്ദ്ര കുമാറിനെയും മൂന്ന് ആണ്‍കുട്ടികളേയും പൊലീസ് അറസ്റ്റ് ചെയ്തു. ബലാത്സംഗം ചെയ്ത കൗമാരക്കാരന്‍ ഒളിവിലാണ്.
◾മങ്കിപോക്സിന്റെ പേരു മാറ്റി. ഇനി മുതല്‍ എംപോക്സ് എന്ന പേരില്‍ അറിയപ്പെടുമെന്ന് ലോകാരോഗ്യസംഘടന പ്രഖ്യാപിച്ചു. മങ്കിപോക്സ് എന്ന പേരില്‍ വംശീയതയുണ്ടെന്ന് ആരോപണം ഉയര്‍ന്നിരുന്നു. മൃഗങ്ങളില്‍നിന്ന് മനുഷ്യരിലേക്കു വൈറസ് വഴി പകരുന്ന രോഗമാണ് മങ്കിപോക്സ്.
◾ഖത്തര്‍ ലോകകപ്പില്‍ ഇന്ന് രാത്രി 8.30 ന് ഇക്വഡോറും സെനഗലും മറ്റൊരു മത്സരത്തില്‍ നെതര്‍ലണ്ട്സും ഖത്തറും ഏറ്റുമുട്ടും. ഇന്ത്യന്‍ സമയം നാളെ വെളുപ്പിന് 12.30 ന് ഇറാനും യുഎസ്എയും മറ്റൊരു മത്സരത്തില്‍ ഇംഗ്ലണ്ടും വെയില്‍സും തമ്മില്‍ ഏറ്റുമുട്ടും.
◾സംസ്ഥാനത്ത് സ്വര്‍ണ്ണവില കുറഞ്ഞു. ഒരു പവന്‍ സ്വര്‍ണ്ണത്തിന് 80 രൂപ കുറഞ്ഞ് 38,760 രൂപയും ഒരു ഗ്രാം സ്വര്‍ണ്ണത്തിന് 10 രൂപ കുറഞ്ഞ് 4845 രൂപയുമായി. സംസ്ഥാനത്ത് കഴിഞ്ഞ അഞ്ച് ദിവസങ്ങളായി സ്വര്‍ണ്ണവിലയില്‍ മാറ്റമില്ലാതെ തുടരുകയായിരുന്നു. ഒരു പവന്‍ സ്വര്‍ണ്ണത്തിന് 38,840 രൂപയും, ഒരു ഗ്രാം സ്വര്‍ണ്ണത്തിന് 4855 രൂപയുമായിരുന്നു വില. 18 കാരറ്റ് സ്വര്‍ണത്തിന്റെ വില 10 രൂപ കുറഞ്ഞു. വിപണിയിലെ വില 4015 രൂപയാണ്. സംസ്ഥാനത്ത് വെള്ളിവില വര്‍ധിച്ചു. ഒരു ഗ്രാം വെള്ളിക്ക് 68.10 രൂപയാണ് വില. എട്ട് ഗ്രാം വെള്ളിയ്ക്ക് 544.80 രൂപയും പത്ത് ഗ്രാം വെള്ളിക്ക് 681 രൂപയും ഒരു കിലോഗ്രാമിന് 68,100 രൂപയുമാണ് ഇന്നത്തെ നിരക്ക്.
◾പുതിയ അപ്ഡേറ്റിലൂടെ ശബ്ദ സന്ദേശങ്ങളും ഇനി സ്റ്റാറ്റസ് ആക്കാം. ഇതിനുള്ള ഫീച്ചര്‍ കൊണ്ടുവരികയാണ് വാട്സ്ആപ്പ്. 30 സെക്കന്‍ഡ് ദൈര്‍ഘ്യമുള്ള വോയിസ് നോട്ടുകളാണ് സ്റ്റാറ്റസ് രൂപത്തില്‍ പങ്കുവെക്കാന്‍ സാധിക്കുക. അതേസമയം, ഒരു ഉപയോക്താവ് തിരഞ്ഞെടുക്കുന്ന ആളുകളുമായി മാത്രമേ വോയ്‌സ് സ്റ്റാറ്റസ് അപ്‌ഡേറ്റുകള്‍ പങ്കിടാന്‍ സാധിക്കുകയുള്ളൂ. അതിനായി പ്രൈവസി സെറ്റിങ്സിനുള്ളില്‍ വെച്ച് കോണ്‍ടാക്ടുകള്‍ തെരഞ്ഞെടുക്കാം. വാട്ട്‌സ്ആപ്പ് സ്റ്റാറ്റസ് അപ്‌ഡേറ്റിലേക്ക് പങ്കിടുന്ന വോയ്‌സ് നോട്ടുകള്‍ എന്‍ഡ്-ടു-എന്‍ഡ് എന്‍ക്രിപ്റ്റഡ് ആയിരിക്കുമെന്നും റിപ്പോര്‍ട്ടില്‍ പറയുന്നുണ്ട്. പുതിയ അപ്ഡേറ്റ് പരീക്ഷണ സ്വഭാവത്തില്‍ വാട്സ്ആപ്പിന്റെ ഐ.ഒ.എസ് ബീറ്റ വേര്‍ഷനില്‍ പ്രവര്‍ത്തനത്തിലാണ്. ഈ ഫീച്ചര്‍ പരീക്ഷണ ഘട്ടത്തിലായതിനാല്‍ ഇപ്പോള്‍ ഉപയോക്താക്കള്‍ക്ക് ലഭ്യമാകില്ല. വരും ദിവസങ്ങളില്‍ യൂസര്‍മാര്‍ക്ക് ഈ ഫീച്ചര്‍ അപ്ഡേറ്റുകളിലൂടെ ലഭിച്ചേക്കും.
◾ഭദ്രന്‍ സംവിധാനം ചെയ്ത് ‘ആടു തോമ’ എന്ന കഥാപാത്രമായി മോഹന്‍ലാല്‍ എത്തിയ ചിത്രം ‘സ്ഫടികം’ വീണ്ടും തീയേറ്ററുകളിലെത്തുന്നു. പുതിയ കാലത്തിന്റെ എല്ലാ സാങ്കേതിക മികവോടും കൂടെ ചിത്രം തീയേറ്ററുകളില്‍ എത്തുമെന്ന് മോഹന്‍ലാലാണ് ഫേസ്ബുക്ക് പോസ്റ്റിലൂടെ അറിയിച്ചത്. ലോകമെമ്പാടുമുള്ള തീയേറ്ററുകളില്‍ 2023 ഫെബ്രുവരി ഒമ്പതിനാണ് ചിത്രം എത്തുന്നത്. 28 വര്‍ഷങ്ങള്‍ക്ക് മുമ്പ് ഇതുപോലൊരു വ്യാഴാഴ്ചയാണ് ആടുതോമയെ നിങ്ങള്‍ ഹൃദയം കൊണ്ട് ഏറ്റുവാങ്ങിയതെന്നും അദ്ദേഹം കുറിച്ചു. 25 വര്‍ഷങ്ങള്‍ക്ക് ശേഷം നിര്‍ണ്ണായക രംഗങ്ങള്‍ക്കായി ക്യാമറ ചലിപ്പിക്കുന്നു എന്നതും പ്രത്യേകതയാണ്. സിനിമയ്ക്കുവേണ്ടി കെ എസ് ചിത്രയും മോഹന്‍ലാലും വീണ്ടും പാടുന്നുണ്ടെന്നും ഭദ്രന്‍ നേരത്തെ അറിയിച്ചിരുന്നു. തിലകനും കെപിഎസി ലളിതയുമായിരുന്നു മോഹന്‍ലാലിന്റെ അച്ഛനും അമ്മയുമായി അഭിനയിച്ചത്. തിലകന്റെ ‘ചാക്കോ മാഷ്’ എന്ന കഥാപാത്രത്തിന് ഏറെ അഭിനന്ദനം ലഭിച്ചിരുന്നു.
◾ടൊവിനോ തോമസിന്റെ പുതിയ ചിത്രം വഴക്കിന്റെ ട്രെയിലര്‍ പുറത്ത്. ചിത്രത്തില്‍ സിദ്ധാര്‍ത്ഥന്‍ എന്ന കഥാപാത്രത്തിലാണ് ടൊവിനോ എത്തുന്നത്. സനല്‍ കുമാര്‍ ശശിധരനാണ് ചിത്രത്തിന്റെ സംവിധായകന്‍. അദ്ദേഹത്തിന്റെ യൂട്യൂബ് ചാനലിലൂടെയാണ് ട്രെയിലര്‍ പുറത്തുവിട്ടിരിക്കുന്നത്. കനി കുസൃതി, സുദേവ് നായര്‍, അസീസ് നെടുമങ്ങാട് എന്നിവരെയും ട്രെയിലറില്‍ കാണാം. ആത്മഹത്യയ്ക്ക് ശ്രമിക്കുന്ന ഒരു സ്ത്രീയെ സിദ്ധാര്‍ത്ഥന്‍ രക്ഷപ്പെടുത്തുന്നതാണ് വീഡിയോയിലുള്ളത്. ചിത്രത്തിന്റെ പോസറ്ററും നേരത്തേ ശ്രദ്ധനേടിയിരുന്നു. ടൊവിനോ തോമസ് പ്രൊഡക്ഷന്‍സും പാരറ്റ് മൗണ്ട് പ്രൊഡക്ഷന്‍സുമാണ് ചിത്രം നിര്‍മിച്ചിരിക്കുന്നത്. തല്ലുമാലയ്ക്ക് ശേഷമുള്ള ടൊവിനോയുടെ സിനിമയാണ് വഴക്ക്.
◾അടുത്ത മാസം ആരംഭത്തോടെ തങ്ങളുടെ വിപണിയിലുള്ള ടൂ വീലറുകള്‍ക്ക് വിലവര്‍ദ്ധനവ് ഉണ്ടാകുമെന്ന് ഹീറോ മോട്ടോക്കോര്‍പ്പ്. മോട്ടോര്‍ സൈക്കിളുകളുടെയും സ്‌കൂട്ടറുകളുടെയും വില 1,500 രൂപ വരെ വര്‍ദ്ധിപ്പിക്കുമെന്നാണ് വിവരം. മൊത്തത്തിലുള്ള പണപ്പെരുപ്പം മൂലമാണ് വിലയിലെ പരിഷ്‌കാരം കമ്പനി നടപ്പിലാക്കാനൊരുങ്ങുന്നത്. വിവിധ മോഡലുകളും സംസ്ഥാനങ്ങളിലെ വിപണിയുമനുസരിച്ച് വിലപരിഷ്‌കാരത്തിലും വ്യത്യാസമുണ്ടാകും. വിലവര്‍ദ്ധനവ് ഉപഭോക്താക്കളെ വലിയ തോതില്‍ ബാധിക്കാതിരിക്കാന്‍ ഫിനാന്‍സ് സൊലൂഷ്യന്‍സ് നല്‍കുന്നത് തുടരുമെന്ന് ഹീറോ മോട്ടോക്കോര്‍പ്പ് അറിയിച്ചിട്ടുണ്ട്. ഹീറോ പുതിയതായി അവതരിപ്പിക്കാനിരിക്കുന്ന മോഡലായ എക്സ്പള്‍സ് 200ടി 4വിയ്ക്കും ഈ വിലവര്‍ദ്ധനവ് ബാധകമായിരിക്കും. അടുത്ത മാസം നടപ്പിലാക്കുന്ന വില പരിഷ്‌കരണത്തിന് ശേഷം എക്സ്പള്‍സ് 200ടി വിപണിയിലെത്തുമെന്നാണ് വിവരം.
◾പുതിയ ചിന്ത, മാനസികവികാസം, സാമ്പത്തികവിജയം, വൈയക്തികാരോഗ്യം എന്നിവയിലെ ഒരു കോഴ്‌സ് എന്ന രീതിയില്‍ രൂപപ്പെടുത്തപ്പെട്ട ചിന്താപദ്ധതിയുടെ പുസ്തകരൂപമാണിത്. സെല്‍ഫ് ഹെല്‍പ്പ് പുസ്തകങ്ങളിലെ ക്ലാസിക് എന്നു വിശേഷിപ്പിക്കപ്പെടുന്ന ചാള്‍സ് എഫ് ഹാനലിന്റെ രചനയുടെ ആദ്യ മലയാള പരിഭാഷ. പുറത്തിറങ്ങി പത്തു വര്‍ഷത്തിനകം ലോകവ്യാപകമായി രണ്ടുലക്ഷത്തോളം കോപ്പികള്‍ വിറ്റഴിക്കപ്പെട്ട പുസ്തകം. ‘മനസ്സിന്റെ വാതിലുകള്‍ തുറക്കാം’. പരിഭാഷ- അനില്‍കുമാര്‍ തട്ടാന്‍പറമ്പില്‍. മാതൃഭൂമി ബുക്സ്. വില 285 രൂപ.
◾അള്‍സറും അസിഡിറ്റി പ്രശ്നവുമുള്ളവര്‍ക്ക് എന്തു കഴിക്കണമെന്ന ആശങ്ക കൂടുതലാണ്. കഴിച്ചശേഷം അസ്വസ്ഥതയുണ്ടാക്കുന്ന ഏത് ആഹാരവും അള്‍സര്‍ അസിഡിറ്റി രോഗികള്‍ ഒഴിവാക്കണം. വയറു നിറച്ചും കഴിക്കുന്ന രീതി മാറ്റി ആവശ്യത്തിനു മാത്രം കഴിക്കുക. അസിഡിറ്റി പ്രശ്നങ്ങളുമായി ബന്ധമില്ലെങ്കിലും വാരിവലിച്ചു കഴിക്കാതെ ആവശ്യത്തിനു സമയമെടുത്തു തന്നെ കഴിക്കണം. അത്താഴത്തിന്റെ അളവു കുറയ്ക്കണം. സമീകൃതാഹാരം ശീലമാക്കാം. അന്നജം, പ്രോട്ടീന്‍, കൊഴുപ്പ് എന്നിവ ശരിയായ അനുപാതത്തില്‍ അടങ്ങിയ ആഹാരം കഴിക്കണം. ദിവസവും നിശ്ചിതസമയം വ്യായാമം ചെയ്യണം. ഇതു പിരിമുറുക്കം കുറയ്ക്കും. നന്നായി ഉറങ്ങുകയും വേണം. ബീറ്റാകരോട്ടിന്‍ ധാരാളമടങ്ങിയ പച്ചക്കറികള്‍, കാരറ്റ്, ബീറ്റ്റൂട്ട്, മത്തങ്ങ, മാങ്ങ എന്നിവ കഴിക്കണം. വൈറ്റമിന്‍ സി അടങ്ങിയ ആഹാരം കഴിക്കണം. ഉദാ: നെല്ലിക്ക, മുന്തിരി, ഓറഞ്ച്, പേരയ്ക്ക ഇവയെല്ലാം കഴിക്കാം. ഇലക്കറികള്‍ കഴിക്കണം. ഇവയില്‍ ധാരാളം നാരുകളുമുണ്ട്. തവിടു നീക്കാത്ത ഗോതമ്പും അരിയും കഴിക്കണം. ഇവയില്‍ അടങ്ങിയിട്ടുള്ള സിങ്ക് അള്‍സര്‍ ഉണങ്ങുന്നതിനു സഹായിക്കും. കടല്‍ വിഭവങ്ങളും ഏറെ നല്ലതാണ്. ദിവസവും 10 മുതല്‍ 12 ഗ്ലാസ് വെള്ളം കുടിക്കണം. കാപ്പിയും ചായയും ഒഴിവാക്കണം. അച്ചാറുകള്‍, മസാലകളും എരിവും ചേര്‍ന്ന ആഹാരവും ഒഴിവാക്കണം. സോഫ്റ്റ് ഡ്രിങ്കുകള്‍ പൊതുവെ ഒഴിവാക്കണം. അവയിലെ വിവിധ ആസിഡുകള്‍ അള്‍സറിന്റെ ലക്ഷണങ്ങളുടെ തീവ്രത വര്‍ധിപ്പിക്കും. ഫ്രിജില്‍ വച്ച ആഹാര സാധനങ്ങള്‍ക്ക് അള്‍സറും അസിഡിറ്റിയുമായി ബന്ധമില്ല. എങ്കിലും അമിത ചൂടും അമിത തണുപ്പുമുള്ള ആഹാരം ഒഴിവാക്കാന്‍ ശ്രദ്ധിക്കണം. കൃത്യസമയത്ത് ആഹാരം കഴിക്കാത്തവരിലും പിരിമുറുക്കം കൂടുതലുള്ളവരിലും അള്‍സറിനു സാധ്യത വളരെ കൂടുതലാണ്.
*ഇന്നത്തെ വിനിമയ നിരക്ക്*
ഡോളര്‍ – 81.68, പൗണ്ട് – 98.23, യൂറോ – 84.59, സ്വിസ് ഫ്രാങ്ക് – 86.03, ഓസ്‌ട്രേലിയന്‍ ഡോളര്‍ – 54.91, ബഹറിന്‍ ദിനാര്‍ – 216.61, കുവൈത്ത് ദിനാര്‍ -265.64, ഒമാനി റിയാല്‍ – 212.16, സൗദി റിയാല്‍ – 21.73, യു.എ.ഇ ദിര്‍ഹം – 22.23, ഖത്തര്‍ റിയാല്‍ – 22.43, കനേഡിയന്‍ ഡോളര്‍ – 60.85.