രാജ്യത്ത് ഒരാള്ക്ക് കൈവശം വെക്കാവുന്ന സിം കാര്ഡുകളുടെ എണ്ണത്തില് സര്ക്കാര് നിയന്ത്രണം ശക്തമാക്കുന്നു. ഇതുമായി ബന്ധപ്പെട്ട പുതിയ നിയമങ്ങള് ഓഗസ്റ്റ് 24 തിങ്കളാഴ്ച മുതല് പ്രാബല്യത്തില് വരും. നിലവിലുള്ള നിയമമനുസരിച്ച്, ഒരാള്ക്ക് പരമാവധി 9 സിം കാര്ഡുകള് വരെയാണ് ഉപയോഗിക്കാന് അനുവാദമുള്ളത്. ജമ്മു കശ്മീര്, അസം, വടക്കുകിഴക്കന് സംസ്ഥാനങ്ങള് എന്നിവിടങ്ങളില് ഇത് 6 സിം കാര്ഡുകള് മാത്രമാണ്. സിം പരിധി സംബന്ധിച്ച നിയമം പുതിയതല്ലെങ്കിലും, അത് കര്ശനമായി നടപ്പിലാക്കാനാണ് സര്ക്കാര് ഇപ്പോള് നടപടി സ്വീകരിക്കുന്നത്. ഇനി മുതല് പുതിയ സിം എടുക്കുന്നതിന് മുന്പ്, ഉപഭോക്താവിന് ഇതിനകം എത്ര കണക്ഷനുകള് ഉണ്ടെന്ന് ടെലികോം കമ്പനികള് ഡിജിറ്റല് ഇന്റലിജന്സ് പ്ലാറ്റ്ഫോം വഴി പരിശോധിക്കും. പുതിയ സംവിധാനം പൂര്ണ്ണമായി നടപ്പിലാക്കാന് ടെലികോം കമ്പനികള്ക്ക് നവംബര് 30 വരെ സമയം അനുവദിച്ചിട്ടുണ്ട്.
