ജന്മദിനത്തിനു ഇരട്ടി മധുരം നല്‍കി പുതിയൊരു വാഹനം സ്വന്തമാക്കിയിരിക്കുകയാണ് ബോളിവുഡ് താരം രണ്‍ബീര്‍ കപൂര്‍. പിറന്നാളാഘോഷത്തിന്റെ ഭാഗമായി തന്റെ ആരാധകര്‍ക്ക് മധുരം പങ്കുവെച്ചതിനു ശേഷം ഏറ്റവും പുതിയ ആഡംബര വാഹനമായ ബെന്റ്‌ലിയില്‍ ആലിയയ്ക്കും മകള്‍ റാഹയ്ക്കുമൊപ്പം മുംബൈയിലെ തിരക്കേറിയ വീഥിയിലൂടെ ഒരു യാത്രയും നടത്തുന്നുണ്ട് രണ്‍ബീര്‍ കപൂര്‍. ഏകദേശം 5.22 കോടി വില വരുന്ന ബെന്റ്‌ലി കോണ്ടിനെന്റല്‍ ജി ടി വി8 ആണ് താരം സ്വന്തമാക്കിയിരിക്കുന്നത്. ഡീപ് ഷെയ്ഡ് ബ്ലൂ നിറമാണ് വാഹനത്തിനായി രണ്‍ബീറും ആലിയയും തിരഞ്ഞെടുത്തിരിക്കുന്നത്. രണ്ടു ഡോറുകള്‍ മാത്രമുള്ള, 4 സീറ്റ് സ്‌പോര്‍ട്‌സ് കൂപ്പെയാണിത്. 4.0 ലീറ്റര്‍ ട്വിന്‍ ടര്‍ബോ ചാര്‍ജ്ഡ് വി8 പെട്രോള്‍ എന്‍ജിനാണ് ഈ ബെന്റ്‌ലിയുടെ കരുത്ത്. 542 ബി എച്ച് പി പവറും 770 എന്‍ എം ടോര്‍ക്കും ലഭിക്കും. 8 സ്പീഡ് ഓട്ടോമാറ്റിക് ട്രാന്‍സ്മിഷനാണ്.