ഒറ്റയാള്‍ പട്ടാളത്തിന്റെ കൗശലയുദ്ധം

തിന്മയുടെ ചളിക്കൊഴുപ്പില്‍ കൂത്താടിയ ഇസ്രയേലിനെ പാഠംപഠിപ്പിക്കാന്‍ ദൈവം തീരുമാനിക്കുകയായിരുന്നു. മിദി യാന്‍കാരെ ഇസ്രയേലിനെതിരേ യുദ്ധത്തിനയച്ചത് അങ്ങനെയാണ്. ഏഴു വര്‍ഷം ഇസ്രയേല്‍ മിദിയാന്‍കാരുടെ കിരാതഭരണത്തിന്റെ എരിതീയില്‍ ഞെരിപിരികൊണ്ടു. ഒരൊറ്റ ഇസ്രയേല്‍ക്കാരനും ഓടിരക്ഷപ്പെടാതിരിക്കാന്‍  ചുറ്റും മിദിയാന്‍ പട്ടാളം താവളമടിച്ചിരിക്കുകയാണ്. മിദിയാന്‍കാരുടെ പീഢനങ്ങളേറ്റ അവര്‍ ചെയ്ത തെറ്റിനേക്കുറിച്ചു പശ്ചാത്തപിക്കാന്‍ തുടങ്ങി.

അക്കാലത്ത് ആരുടേയും പിടിയിലകപ്പെടാതെ ഒരു ഇസ്രേലി ചെറുപ്പക്കാരന്‍ ഒളിവില്‍ കഴിഞ്ഞിരുന്നു- ഗിദെയോണ്‍. അക്രമികളുടെ കണ്ണുവെട്ടിച്ച് വിളയിച്ചെടുത്ത അല്പം ഗോതമ്പ് മെതിക്കുകയായിരുന്നു അയാള്‍. പെട്ടെന്ന് ഒരാള്‍ അയാള്‍ക്കുമുന്നില്‍ പ്രത്യക്ഷപ്പെട്ടു. ‘ദൈവം നിന്നെ അനുഗ്രഹിക്കട്ടെ.’- ആഗതന്‍ ആശംസിച്ചു.

‘ഹൊ! ദൈവം. അദ്ദേഹം എന്നെ അനുഗ്രഹിക്കുന്നുണ്ടെങ്കില്‍ ഞാനും എന്റെ ആള്‍ക്കാരും ഇങ്ങനെ കഷ്ടപ്പെ ടേണ്ടിവരില്ലായിരുന്നു.’ ഗിദെയോണിന്റെ മറുപടി.

‘ഞാന്‍ ദൈവദൂതനായ ഒഫ്രായിലാണ്. തിന്മയ്ക്കു ശിക്ഷ ഉറപ്പാണ്. മിദിയാന്‍കാരുടെ പിടിയില്‍നിന്ന് ഇസ്രയേലിനെ രക്ഷിക്കാന്‍ ദൈവം നിന്നെ നിയോഗിച്ചിരിക്കുന്നു. ഇക്കാര്യം അറിയിക്കാന്‍ വന്നതാണ്.’

‘ഞാനോ? ഒരു പുഴുവിനേപ്പോലെ ദുര്‍ബലനായ ഞാന്‍ ശതകോടികള്‍ വരുന്ന ശക്തരായ മിദിയാന്‍ പട്ടാളത്തെ തുരത്തി ഇസ്രയേലിനെ മോചിപ്പിക്കാനോ?’ വിസ്മയത്തോടെ അയാള്‍ പുലമ്പി.

‘അതേ, നിനക്കതിനു കഴിയും. ദൈവത്തിന്റെ ശക്തി നിന്നോടൊപ്പമുണ്ട്.’ – ദൈവദൂതന്‍.

ഗിദെയോണിനു വിശ്വസിക്കാനായില്ല. തന്നെ കുഴിയില്‍ ചാടിക്കാന്‍ ദൈവത്തിന്റെ പേരുംപറഞ്ഞു വന്നിരിക്കുന്ന തട്ടിപ്പുകാരനാകുമോ? ദൈവം ഇടപെടുന്നുണ്ടെന്ന് മനസിലാക്കുന്നത് എങ്ങനെ? അയാള്‍ ആലോചിച്ചു. ഒടുവില്‍ ഒരു ബോധമുദിച്ചു. പെട്ടെന്ന് ഒരാട്ടിന്‍കുട്ടിയെ പിടിച്ചുകൊണ്ടുവന്ന് ദൈവത്തിനു ബലിയര്‍പ്പിച്ചു.

”അങ്ങു പറഞ്ഞതു ദൈവത്തിന്റെ നാമത്തില്‍ സത്യമാണെങ്കില്‍ ഈ ബലി ദൈവം സ്വീകരിക്കണം.’

ദൈവദൂതന്‍ കൈയിലിരുന്ന വടി ബലിവസ്തുവിനുനേരെ ചൂണ്ടി. പെട്ടെന്ന് ഒരു തീനാളം ബലി വസ്തുവിനെ വിഴുങ്ങി. അമ്പരപ്പോടെ ഗിദെയോണ്‍ ദൈവദൂതനെ തിരിഞ്ഞു നോക്കി. പക്ഷേ, അദ്ദേഹം അപ്പോഴേക്കും അപ്രത്യക്ഷനായിരുന്നു.

അന്നു രാത്രി ഗിദെയോണ്‍ ജനങ്ങള്‍ ആരാധിച്ചിരുന്ന ബാല്‍ദേവന്റെ യാഗപീഠം ഇടിച്ചുനിരത്തി. ബാലിന്റേയും അഷേരായുടേയും പ്രതിഷ്ഠകള്‍ തകര്‍ത്തു. അതിനുമുകളില്‍ പുതിയൊരു യാഗപീഠം പണിതു. അവിടെ ദൈവത്തിനായി ഒരു കാളക്കുട്ടിയെ ബലിയര്‍പ്പിച്ചു.

പ്രഭാതമായപ്പോള്‍ ജനം ഇതുകണ്ട് രോഷാകുലരായി. തങ്ങള്‍ ആരാധിച്ചിരുന്ന ദേവനെ തകര്‍ത്ത് പുതിയ യാഗപീഠമുണ്ടാക്കിയത് അവര്‍ക്കു സഹിക്കാനായില്ല. ഗിദെയോണാണ് ഇതിനു പിന്നിലെന്നു മനസിലായപ്പോള്‍ അയാളെ വധിക്കാന്‍ ജനം കൂട്ടംകുട്ടമായെത്തി.

‘നിങ്ങള്‍ക്കു ബാല്‍ദേവനെയാണോ വേണ്ടത്, അതോ മിദിയാന്‍കാരില്‍നിന്നുള്ള സ്വാതന്ത്ര്യമോ?’- ഗിദെയോണ്‍ ഉച്ചത്തില്‍ ചോദിച്ചു.

ബാല്‍ദേവനുവേണ്ടി ഗിദെയോണിനെ കൊല്ലാന്‍ വന്നവര്‍ സ്വാതന്ത്യമെന്ന വാക്കുകേട്ട് ആവേശഭരിതരായി. ‘ബാല്‍ തുലയട്ടെ, സ്വതന്ത്ര്യമാണു വേണ്ടത്.’ അവരെല്ലാം ഏകസ്വരത്തില്‍ പറഞ്ഞു.

‘നമുക്കു സ്വാതന്ത്യ്രം കിട്ടുമോ?’ ചിലര്‍ ആരാഞ്ഞു.

‘ദൈവത്തിന്റെ അനുഗ്രഹത്തോടെ നമുക്കതു നേടിയെടുക്കാം.’ ഗിദെയോണിന്റെ മറുപടി. വിവരമറിഞ്ഞ് പതിനായിരക്കണക്കിനു ഇസ്രയേല്‍ക്കാര്‍ അവിടെ പാഞ്ഞെത്തി. സ്വാതന്ത്യത്തിനുള്ള യുദ്ധത്തിനിറങ്ങാന്‍ അവര്‍ തയാറായിരുന്നു. അപ്പോഴാണു ചിലര്‍ക്കു സംശയം. യുദ്ധത്തില്‍ ദൈവം തങ്ങളെ തുണയ്ക്കുമോ? എന്താണ് ഉറപ്പ്?

ഗിദെയോണ്‍ ആട്ടിന്‍തോലുകൊണ്ടുണ്ടാക്കിയ പുത്തന്‍ ഉടുപ്പ് വീട്ടുമുറ്റത്തു വിരിച്ച് ദൈവത്തോട് അപേക്ഷിച്ചു. ‘തെളിവു നല്കാന്‍ അങ്ങ് ഈ ഉടുപ്പില്‍ മാത്രം മഞ്ഞുപെയ്യിക്കണേ.’

അല്പനിമിഷത്തിനകം രോമക്കുപ്പായത്തില്‍ പഞ്ഞിത്തുണ്ടുകള്‍പോലെ ഹിമകണങ്ങള്‍ വന്നുവീണു.

എല്ലാവര്‍ക്കും വിശ്വാസമായി. ഗിദെയോണിന്റെ നേതൃത്വത്തില്‍ അവര്‍ യുദ്ധത്തിനു പുറപ്പെട്ടു. നാല്പതിനായിരത്തോളം പേരുണ്ട്. വഴിമധ്യേ, ദൈവം ഗിദെയോണിനു പ്രത്യക്ഷപ്പെട്ടു.

‘ഇത്രയേറെപ്പേര്‍ ആവശ്യമില്ല. ഭയമുള്ളവര്‍ വേണ്ട. മടങ്ങിപ്പോകുക.’

ഗിദെയോണ്‍ അക്കാര്യം ഉച്ചത്തില്‍ വിളിച്ചുകൂവി. മുപ്പതിനായിരത്തോളം പേരാണ് മടങ്ങിപ്പോയത്. ശേഷിച്ചതു പതിനായിരത്തോളം യോധാക്കള്‍.
ദൈവം വീണ്ടും പ്രത്യക്ഷപ്പെട്ടു. ‘ഇത്രയുംപേര്‍ ആവശ്യമില്ല. ഇവരില്‍ വിശ്വസിക്കാവുന്നവരെമാത്രം തെര ഞെഞ്ഞെടുക്കുക. തെരഞ്ഞെടുപ്പു ഞാന്‍ എളുപ്പമാക്കിത്തരാം. തൊട്ടടുത്ത ജലാശയത്തിലേക്ക് ഇവരെ കൂട്ടിക്കൊണ്ടുവ രിക. എല്ലാവരോടും വെള്ളം കുടിക്കാന്‍ നിര്‍ദേശിക്കണം. മുട്ടുകുത്തിനിന്ന് വെള്ളംകുടിക്കുന്നവരെ മടക്കിയയക്കുക. കൈക്കുമ്പിളില്‍ വെള്ളമെടുത്ത് മൊത്തിക്കുടിക്കുന്നവരെ നിന്നോടൊപ്പം കൊണ്ടുപോകുക.’

മുന്നൂറുപേരെ ഒഴിച്ച് എല്ലാവരേയും മടക്കിയയക്കേണ്ടിവന്നു. ഗിദെയോണിന്റെ മുന്നൂറംഗ പട്ടാളം രാജ്യാതിര്‍ത്തിയിലേക്കു മാര്‍ച്ചു ചെയ്തു. മിദിയാന്‍ പട്ടാളം തമ്പടിച്ചിരിക്കുന്നത് അവിടെയാണ്.

അതിര്‍ത്തിയോടടുത്തപ്പോള്‍ രാത്രിയായി. എല്ലാവരേയും ഇരുളില്‍നിര്‍ത്തി ഗിദെയോണ്‍ ഒരു സഹായിയേയുംകൂട്ടി മുന്നോട്ടു നടന്നു. അങ്ങകലെ മിദിയാന്‍ പട്ടാളത്തിന്റെ ആയിരക്കണക്കിനു കൂടാരങ്ങള്‍. അങ്ങിങ്ങു കത്തിയെരിയുന്ന തീപ്പന്തങ്ങളും അഗ്‌നികുണ്ഠങ്ങളും. അവയില്‍നിന്നു നേര്‍ത്തപ്രകാശമുണ്ട്. ആരുടേയും കണ്ണില്‍പ്പെടാതെ ഒരു കൂടാരത്തിനരികിലെത്തിയപ്പോള്‍ അകത്തുനിന്നു കുറച്ചുപേര്‍ സംസാരിക്കുന്നതു കേട്ടു.

തലേന്നു രാത്രി ഒരാള്‍ കണ്ട സ്വപ്നം വിവരിക്കുകയാണ്. കുന്നിന്‍മുകളില്‍നിന്ന് ഒരു ബാര്‍ളിയപ്പം അവിടേക്കു വീണുരുണ്ടു. അത് തങ്ങളുടെ കൂടാരത്തില്‍തട്ടി. കൂടാരം നിലംപരിശായി. ഇതാണു സ്വപ്നം. അപ്പോള്‍ മറ്റൊരാള്‍: ഞാനും കണ്ടു ഇത്തരത്തിലൊരു സ്വപ്നം.

‘ഇസ്രയേല്‍ക്കാരനായ ഗിദെയോണ്‍ എന്നയാള്‍ നമ്മെയെല്ലാം കൊത്തിയരിയുമെന്നാണു ഞാന്‍ സ്വപ്നം കണ്ടത്.’- വേറെയൊരാള്‍ പറഞ്ഞു.

ആ പ്രദേശത്തിന്റെ ഭൂമിശാസ്ത്രവും പട്ടാളക്കൂടാരങ്ങളുടെ സ്വഭാവവും മനസിലാക്കി ഗിദെയോണ്‍ മടങ്ങി. പാതിരാത്രി കഴിഞ്ഞപ്പോള്‍ മുന്നൂറു പേരുമൊന്നിച്ച് ശബ്ദമുണ്ടാക്കാതെ തിരിച്ചെത്തി. പട്ടാളകൂടാരങ്ങളില്‍ എല്ലാവരും നല്ല ഉറക്കമാണ്. കൂടാരങ്ങള്‍ക്ക് അടുത്തെത്തിയപ്പോള്‍ ഗിദെയോണും സംഘവും തങ്ങളുടെ കൈകളിലുണ്ടായിരുന്ന പന്തങ്ങള്‍ തെളിച്ചു.

‘ദൈവനിയോഗമനുസരിച്ച് ഇതാ ഗിദെയോണ്‍ വന്നിരിക്കുന്നു.’ എല്ലാവരും ചേര്‍ന്ന് ഉറക്കെ ആക്രോശിച്ചു.

ബഹളം കേട്ട് കൂടാരങ്ങളില്‍ ഉറങ്ങിക്കിടന്നിരുന്ന മിദിയാന്‍ പട്ടാളക്കാര്‍ ഞെട്ടിയുണര്‍ന്നു. അവര്‍ വാളെടുത്ത് തലങ്ങും വിലങ്ങും വെട്ടി. പാളയത്തില്‍ ശത്രുവേത് മിത്രമേത് എന്നു തിരിച്ചറിയാനാകാതെ കൂരിരുട്ടില്‍ പൊരിഞ്ഞ യുദ്ധം. മിദിയാന്‍ പട്ടാളം ശത്രുവാണെന്നു കരുതി സ്വന്തം പട്ടാളക്കാരെത്തന്നെ വെട്ടിക്കൊന്നു. പ്രാണരക്ഷാര്‍ഥം ഓടിരക്ഷപ്പെടാന്‍ ശ്രമിച്ചവരെ ഗിദെയോണും സംഘവും പിന്തുടര്‍ന്ന് വെട്ടിയരിഞ്ഞു.

നേരം പുലര്‍ന്നപ്പോഴേക്കും യുദ്ധം അവസാനിച്ചിരുന്നു. പതിനായിരക്കണക്കിനു പട്ടാളക്കാരുടെ ജഡം അവിടെ ചിതറിക്കിടക്കുന്നു. അവരുടെ കബന്ധങ്ങളില്‍നിന്നൊഴുകിയ ചുടുരക്തത്തില്‍ മണല്‍പ്പരപ്പ് കുതിര്‍ന്നു.

ഗിദെയോണും മുന്നൂറുപേരടങ്ങുന്ന സംഘവും മടങ്ങിയെത്തിയപ്പോള്‍ ഇസ്രയേല്‍ ജനം വിജയം ആഘോഷിച്ചു.