മമ്മൂട്ടിയും ജ്യോതികയും മുഖ്യ വേഷങ്ങളിലെത്തുന്ന ജിയോ ബേബി ചിത്രം കാതലിലെ പുതിയ ഗാനം പ്രേക്ഷകര്‍ക്കരികില്‍. ‘എന്നും എന്‍ കാവല്‍’ എന്നു തുടങ്ങുന്ന പാട്ടിന്റെ ലിറിക്കല്‍ വിഡിയോ ആണ് പ്രേക്ഷകര്‍ക്കരികിലെത്തിയത്. അന്‍വര്‍ അലി എഴുതിയ വരികള്‍ക്ക് മാത്യൂസ് പുളിക്കന്‍ ഈണമൊരുക്കി. ജി.വേണുഗോപാലും കെ.എസ്.ചിത്രയും ചേര്‍ന്നാണു ഗാനം ആലപിച്ചത്. ‘എന്നും എന്‍ കാവല്‍’ എന്ന ഗാനം ചുരുങ്ങിയ സമയത്തിനകം ശ്രദ്ധേയമായിക്കഴിഞ്ഞു. നിരവധി പേരാണു പ്രതികരണങ്ങള്‍ അറിയിച്ചു രംഗത്തെത്തുന്നത്. മിഥുന്‍.വി.ദേവ് ആണ് പാട്ടിന്റെ മിക്‌സിങ് നിര്‍വഹിച്ചത്. നിഖില്‍ റാം പുല്ലാങ്കുഴലിലും ആനന്ദ് തബലയിലും താളമിട്ടു. പാട്ട് ഇതിനകം നിരവധി ആസ്വാദകരെയും സ്വന്തമാക്കിക്കഴിഞ്ഞു. ജിയോ ബേബി സംവിധാനം ചെയ്യുന്ന എഴാമത്തെ ചിത്രമാണ് ‘കാതല്‍’. 12 വര്‍ഷങ്ങള്‍ക്കു ശേഷം ജ്യോതിക മലയാള സിനിമയിലേക്കു തിരിച്ചെത്തുന്നുവെന്ന പ്രത്യേകതയും ചിത്രത്തിനുണ്ട്. ലാലു അലക്‌സ്, മുത്തുമണി, ചിന്നു ചാന്ദിനി, സുധി കോഴിക്കോട്, അനഘ അക്കു, ജോസി സിജോ, ആദര്‍ശ് സുകുമാരന്‍ തുടങ്ങിയവരാണ് ചിത്രത്തിലെ മറ്റു പ്രധാന അഭിനേതാക്കള്‍. നവംബര്‍ 23 ന് ‘കാതല്‍’ തിയറ്റുകളിലെത്തും.
