ആറ് വര്‍ഷത്തെ ഒഎസ് അപ്‌ഡേറ്റോടെ സാംസങ് ഗ്യാലക്‌സി എ16 5ജി സ്മാര്‍ട്ട്‌ഫോണ്‍ ഇന്ത്യയില്‍ പുറത്തിറക്കി. ബഡ്ജറ്റ് ഫോണ്‍ വിഭാഗത്തില്‍ ദക്ഷിണ കൊറിയന്‍ ബ്രാന്‍ഡിന്റെ ഏറ്റവും പുതിയ മോഡലാണിത്. മീഡിയടെക് ഡൈമന്‍സിറ്റി 6300 പ്രൊസസറില്‍ എത്തുന്ന ബഡ്ജറ്റ് ഫ്രണ്ട്‌ലി ഫോണ്‍ മെച്ചപ്പെട്ട ഫീച്ചറുകള്‍ ഉറപ്പാക്കിയിട്ടുണ്ട്. 18,999 രൂപയില്‍ ആരംഭിക്കുന്ന ഈ ഫോണ്‍ ആമസോണ്‍, ഫ്‌ലിപ്കാര്‍ട്ട്, സാംസങിന്റെ ഒഫീഷ്യല്‍ വെബ്‌സൈറ്റ്, റീടെയ്ല്‍ ഔട്ട്‌ലറ്റുകള്‍ എന്നിവ വഴി ലഭ്യമാകും. സാംസങ് എ16 5ജിയുടെ 8 ജിബി റാം + 256 ജിബി സ്റ്റോറേജ് വേരിയന്റിനാണ് 18,999 രൂപയാവുക. അതേസമയം 8 ജിബി + 256 ജിബി വേരിയന്റിന് 21,999 രൂപയാണ് വില. 6.7 ഇഞ്ച് ഫുള്‍ എച്ച്ഡി+ സൂപ്പര്‍ അമോല്‍ഡ് ഡിസ്‌പ്ലെയോടെയാണ് സാംസങ് എ16 5ജി സ്മാര്‍ട്ട്‌ഫോണ്‍ വരുന്നത്. സൈഡ്-മൌണ്ടഡ് ഫിംഗര്‍പ്രിന്റ് സ്‌കാനര്‍, 5,000 എംഎഎച്ച് ബാറ്ററി, 25 വാട്ട്‌സ് ഫാസ്റ്റ് ചാര്‍ജിംഗ്, ഐപി54 റേറ്റിംഗ് എന്നിവയാണ് മറ്റ് പ്രത്യേകതകള്‍.