മഴക്കാല തയ്യാറെടുപ്പ് പ്രവര്ത്തനങ്ങള് ഊര്ജ്ജിതമായി നടത്താന് സംസ്ഥാന ദുരന്തനിവാരണ അതോറിറ്റി യോഗത്തില് മുഖ്യമന്ത്രി പിണറായി വിജയന് നിര്ദ്ദേശിച്ചു. ജൂണ് 4 ന് മണ്സൂണ് തുടങ്ങുമെന്ന് കേന്ദ്ര കാലാവസ്ഥ വകുപ്പ് അറിയിച്ചിട്ടുണ്ട്. മഴയുടെ ലഭ്യതയില് പ്രവചനാതീതസ്വഭാവം പ്രതീക്ഷിക്കുന്നതിനാല് ജില്ലകളിലെ മഴക്കാല തയ്യാറെടുപ്പ് പ്രവര്ത്തനങ്ങളുടെ അവലോകനം ജൂണ്, ജൂലൈ, ഓഗസ്റ്റ്, സെപ്റ്റംബര് മാസങ്ങളില് ആദ്യ ആഴ്ചയില് പ്രത്യേകമായി നടത്തണം. ജില്ലയുടെ ചുമതലയുള്ള മന്ത്രിമാരുടെയോ ജില്ലാ കളക്ടര്മാരുടെയോ നേതൃത്വത്തില് ഇത്തരത്തില് യോഗം ചേരണം. അതില് ഓരോ പ്രവര്ത്തികളുടെയും പുരോഗതി അവലോകനം ചെയ്യണമെന്നും മുഖ്യമന്ത്രി നിര്ദ്ദേശിച്ചു.
