പണം ഈടാക്കിയുള്ള വെരിഫിക്കേഷന്‍ സംവിധാനത്തിന് ഇന്ത്യയിലും തുടക്കം കുറിച്ച് മെറ്റ. പ്രമുഖ സോഷ്യല്‍ മീഡിയ പ്ലാറ്റ്‌ഫോമുകളായ ഫേസ്ബുക്ക്, ഇന്‍സ്റ്റഗ്രാം എന്നിവയ്ക്കാണ് സബ്‌സ്‌ക്രിപ്ഷന്‍ മുഖാന്തരം ബ്ലൂ ടിക്ക് നല്‍കുന്നത്. റിപ്പോര്‍ട്ടുകള്‍ പ്രകാരം, ഉപഭോക്താക്കള്‍ക്ക് ഇപ്പോള്‍ തന്നെ വെരിഫിക്കേഷനായി അപേക്ഷിക്കാന്‍ സാധിക്കും. വെയിറ്റിംഗ് ലിസ്റ്റില്‍ ഇടം നേടുന്ന ഉപഭോക്താക്കളില്‍ യോഗ്യരായവര്‍ക്ക് ബ്ലൂ ടിക്ക് നല്‍കുന്നതാണ്. ആന്‍ഡ്രോയിഡ്, ഐഒഎസ് ഉപയോക്താക്കള്‍ക്ക് അതത് ഫോണിലെ ആപ്പുകള്‍ മുഖേന വെരിഫിക്കേഷന്‍ നേടുമ്പോള്‍ പ്രതിമാസം 1,450 രൂപയാണ് സബ്‌സ്‌ക്രിപ്ഷന്‍ തുകയായി നല്‍കേണ്ടത്. വെബിലൂടെ ആക്‌സസ് ചെയ്യുന്നവരില്‍ നിന്നും 1,099 രൂപയാണ് ഈടാക്കുക. വെരിഫൈഡ് അക്കൗണ്ടുകള്‍ക്ക് മെറ്റ കൂടുതല്‍ സുരക്ഷ ഉറപ്പുവരുത്തുന്നുണ്ട്. കൂടാതെ, പോസ്റ്റുകള്‍, റീലുകള്‍ എന്നിവയ്ക്കും കൂടുതല്‍ പ്രചാരം ലഭിക്കുന്നതാണ്. വെരിഫിക്കേഷന്‍ പ്രക്രിയ പൂര്‍ത്തിയാക്കാന്‍ ഏതെങ്കിലും സര്‍ക്കാര്‍ അംഗീകൃത തിരിച്ചറിയല്‍ രേഖ ആവശ്യമാണ്. ആദ്യ ഘട്ടത്തില്‍ ന്യൂസിലാന്‍ഡ്, ഓസ്‌ട്രേലിയ, അമേരിക്ക എന്നിവിടങ്ങളിലെ ഉപഭോക്താക്കള്‍ക്കാണ് സബ്‌സ്‌ക്രിപ്ഷനിലൂടെ ബ്ലൂ ടിക്ക് സേവനം ലഭിച്ചിരുന്നത്.