വിജയ് ചിത്രം ‘ലിയോ’യില്‍ പാട്ടുകള്‍ കുറവായിരിക്കുമെന്ന് പുതിയ റിപ്പോര്‍ട്ട്. പുത്തന്‍ സെന്‍സേഷന്‍ അനിരുദ്ധ് രവിചന്ദറാണ് സംഗീതം ഒരുക്കുന്നത്. ഇതിനകം ‘ലിയോ’യിലെ ഗാനത്തിന്റെ ലിറിക്കല്‍ വീഡിയോ ഹിറ്റായിരുന്നു. ‘നാ റെഡി’യെന്ന ഗാനത്തിന്റെ ലിറിക്കല്‍ വീഡിയോയിരുന്നു ചിത്രത്തിലേതായി പുറത്തുവിട്ടിരുന്നത്. തീം സോംഗും ബാാക്ക്ഗ്രൗണ്ട് സ്‌കോറുമല്ലാതെ ചിത്രത്തില്‍ രണ്ട് പാട്ടുകള്‍ മാത്രമായിരിക്കും ഉണ്ടാകുക എന്നതാണ് പുതിയ റിപ്പോര്‍ട്ട്. ആക്ഷന് പ്രാധാന്യം നല്‍കിയാണ് ഇത്തവണ വിജയം ചിത്രം എത്തുന്നത്. ആക്ഷന് നടന്‍ എന്ന നിലയില്‍ താരത്തെ പരമാവധി അവതരിപ്പിക്കാനാണ് ലോകേഷ് കനകരാജ് ശ്രമിക്കുന്നത്. ഇക്കാര്യം ബാബു ആന്റണിയും സ്ഥിരീകരിച്ചിരുന്നു. തൃഷ വീണ്ടും വിജയ്‌യുടെ നായികയാകുന്നതും ചിത്രത്തിന്റെ പ്രത്യേകതയാണ്. ഗൗതം വാസുദേവ് മേനോന്‍, അര്‍ജുന്‍, മാത്യു തോമസ്, മിഷ്‌കിന്‍, സഞ്ജയ് ദത്ത്, പ്രിയ ആനന്ദ്, മന്‍സൂര്‍ അലി ഖാന്‍, സാന്‍ഡി മാസ്റ്റര്‍, ബാബു ആന്റണി, മനോബാല, ജോര്‍ജ്, അഭിരാമി വെങ്കടാചലം, ഡെന്‍സില്‍ സ്മിത്ത്, മഡോണ സെബാസ്റ്റ്യന്‍, അനുരാഗ് കശ്യപ് തുടങ്ങിവരും വിജയ് നായകനായ ‘ലിയോ’യില്‍ വേഷമിടുന്നു.